Observerte barn på isen: Politiet åtvarar på det sterkaste

Tysdag føremiddag fekk politiet melding frå ein bilist som observerte barn ute på isen på Opsangervatnet.

– Det er berre ein ting å seia, det er farleg. Berre hundre meter frå staden desse vart observert så var det heilt ope. Vi må åtvara på det sterkaste om å gå ut på isen, seier politioverbetjent Torgeir Fosse i Kvinnherad lensmannsdistrikt.

Det var nokon gutar i ungdomsskulealder som var ute og testa isen tysdag føremiddag. Dei kom seg i land utan å gå gjennom, men har fått klar beskjed om å ikkje gjera det att.

– Vi rykte ut for å sjå til at dei kom seg trygt på land. Vi har så vore i kontakt med skulen, og skulen har allereie teke tak i det, seier Fosse.

Sjølv om det skulle bli fleire dagar med kulde så åtvarar politiet om å bevega seg ut på Opsangervatnet.

– Opsangervatnet er lunefullt og det er store variasjonar på isen. Det er difor ingenting å tenkja på å gå ut på isen eingong, seier han.