Obas Vest vann Husnes barneskule
Obas Vest tilbyr å byggja nye Husnes barneskule for om lag 181 millionar kroner, opplyser kommunedirektøren torsdag.
Publisert
Sist oppdatert
I samband med formannskapsmøtet på Husnes torsdag, har konstituert kommunedirektør Gunn Berit Sandnes Fosse orientert om at det kom inn to tilbod om bygging av nye Husnes barneskule innan fristen.
Konkurransegrunnlag for prosjektet har vore ute på anbod, utarbeidd av Norconsult, og hadde frist 27. mars.
Annonse
– Tildelingskriteria var 80 prosent pris og 20 prosent kompetanse. Det var stor skilnad på tilboda, og Obas Vest AS vann konkurransen framfor Lab Entreprenør AS. Tilbodssummen frå Obas var om lag 181 millionar, inkludert mva, opplyser kommunedirektøren.
Melding om tildeling av konkurranse vart sendt ut onsdag. Det er ein karensfrist på 21 dagar, i praksis 11. mai kl 12.00). Dersom det ikkje kjem klage på tildelinga kan det verta kontraktskriving i midten av mai.
– Anbodssummen er såleis innafor prosjektramme 260 millionar kroner, inkludert mva, likevel er det viktig å merka seg at tilbodssummen berre er entreprisekostnad. Kostnadar med byggjeleiing, uføresette utgifter, indeksregulering, møblar og inventar, tidlegare medgåtte kostnadar, prisstigning, IT-utstyr, kunstnarisk utstilling og så vidare er ikkje med i summen, presiserer kommunedirektøren i orienteringa.
