Nytt strategidokument: Vindkraft og Muradalen

Kvinnherad Energi har no utarbeidd ein samla strategiplan for seg sjølv og dotterselskapet Kvinnherad Breiband.

– Vi hadde ikkje det frå før, så vi starta litt på skrætsj, sa styreleiar Magne Heimvik under ei orientering til kommunestyret på torsdag.

Kvinnherad Energi har berre éin tilsett på timebasis, medan Kvinnherad Breiband har 15 faste og to lærlingar.

Heimvik understreka at Kvinnherad Energi har store verdiar. Dette gjennom å eiga Hattebergsdalen kraftverk, drifta Valen kraftverk og eiga Kvinnherad Breiband. Dei har òg eit samarbeid med SKL om å byggja Onarheim kraftverk, med ifølgje Heimvik står dette prosjektet litt i stampe.

For å utvikla energiselskapet vidare, har dei i planarbeidet sett på mange alternativ. Alt frå solkraft til biogass, vindkraft og solceller. Datalagring kan vera eit anna satsingsområde.

– Dette har jo eit negativt stempel. Men ser vi på utviklinga, så er det behov for mindre einingar. Datalagring i mindre skala kan vera noko å sjå på, vurderte Magne Heimvik.

Store variasjonar

Han meiner vidare det er mogleg å auka kraftproduksjonen i Hattebergsdalen (Muradalen) i Rosendal.

– Dette går rett og slett på; kan vi få meir ut av desse installasjonane ved å køyra dei meir optimalt på tidspunkta? Det vi opplever no er rimeleg store variasjonar over døgnet og vekene på prisar. Vi er òg tydelege på at vi ynskjer å vurdera minikraftproduksjon i vassdraget, utan å utfordra vernegrensene på nokon som helst måte, sa han.

Utifrå analysane tilrår selskapet følgjande:

* Sikra effektiv og rasjonell drift av Hattebergsdalen kraftstasjon.

* Gjennomføra simulering av Hattebergsvassdraget for å optimalisera kraftproduksjonen.

* Vurdera minikraft i Hattebergsvassdraget, utan å utfordra vernestatusen.

Styret i Kvinnherad Energi tilrår elles å prøva å kjøpa Valen kraftverk, gjennomføra Onarheim kraftverk, meir småkraftproduksjon i Kvinnherad, kartleggja potensiale for fornybar energi, gjerne ta ei aktiv rolle i den grøne næringsparken, og halda fram som eigar av Kvinnherad Breiband. Heimvik estimerte at sistnemnde er verdt mellom 200 og 300 millionar kroner.

Urimeleg lite

Ove Lemicka (Frp) var samd i det aller meste. Spesielt støtta han å sjå nærare på Hattebergsdalen.

– Kan vi få ut meir kraft der inne? Eg veit det er kontroversielt, men med det potensialet som er i Hattebergsdalen, er det urimeleg lite vi har fått ut, filosoferte han.

Til det svarte Heimvik at om ein skal gjera noko meir omfattande enn minikraftverk, så må politikarane fyrst starta ein prosess for å klargjera om det er politisk gjennomførbart.

Lemicka hadde elles merka seg uttalane om vindkraft.

– De skriv mykje fint om potensialet for vindkraft i Kvinnherad. Eg vil berre understreka at kommunestyret er heilt tydeleg på at det ikkje er aktuelt med vindkraft i Kvinnherad, understreka han.

Berre sletta det

Også Gunnar Helleland (INP) hadde merka seg punktet om vindkraft i strategiplanen.

– Avsnittet om vindkraft kan de berre ta ut. Det ser nesten ut som at de jobbar for eit vindkraftfirma. Her står det: «Startar ein arbeidet med å greia ut kommersiell vindkraft i 2024, kan det realiserast i 2028-29. Det er potensiale for vindkraft i Kvinnherad både i indre og ytre luten». Er dette noko de jobbar med?, kommenterte Helleland.

– Vi har ingen konkrete planar om vindkraft. Dette er berre ein omtale av kva som er potensialet i denne kommunen, responderte Magne Heimvik.