Nytt smittetilfelle i Kvinnherad – fleire må feira jul i karantene

Tysdag kveld fekk kommuneoverlegen melding om eit nytt tilfelle av Covid-19 i Kvinnherad.

– Vi gjennomførte smittesporing i går kveld, og har grei oversikt per no. Det er snakk om 16 personar som skal testast i dag, seier kommuneoverlege Glenn André Opland.

Det betyr at desse må feira jul i karantene.

– Det er ikkje ein veldig kjekk beskjed å overlevera så tett mot jul, men folk er innstilt på det, seier Opland.

Fleire av nærkontaktane som skal testast i løpet av dagen jobbar på rådhuset.

– Ein god del av miljøet som er råka høyrer til på rådhuset, ja, seier Opland.

Rådhuset vert ikkje stengt som følgje av smittetilfellet, og held med det ope som normalt veslejulaftan.