Nytt rekordår for norsk frukt
Den norske fruktsesongen er i gang for fullt, og prognosane viser at det er venta mykje norskprodusert frukt i butikkane i haust.
Opplysingskontoret for frukt og grønt skriv i ei pressemelding at det, nett som i fjor, ser ut til å bli eit svært godt fruktår.
– Det er ein rekordstor produksjon med 711 tonn morellar mot 658 tonn i fjor, fortel ernæringsrådgjevar Iselin Bogstrand Sagen i Opplysingskontoret for frukt og grønt, og viser til Grøntprodusentenes samarbeidsråd (GPS) sin fruktprognose for hausten.
Annonse
– No er dei norske morellane å få kjøpt i butikkane, så no gjeld det å nyta norske morellar, seier ho og minner om at sesongen er kort.
Plommer, eple og pærer
Innhausting av plommer starta i slutten av juli, og plommene er å finna i butikken fram til fyrste veka i september. I fjor var det rekordår for plommer, og denne sesongen er volumet endå større, med ein auke på 19 %, viser ferske tal frå GPS.
– På grunn av den varme mai-månaden me hadde, kan me forventa å finna store og søte plommer frå avlinga i år, fortel Harald Alvavoll i styringsgruppa for frukt.
Annonse
Den norske pæresesongen ser ut til å bli nesten like god som den var i fjor, med 577 tonn mot 594 tonn i fjor. Me kan forventa norske eple og pærer i butikk frå september av.
