Nytt og etterlengta tilbod ved KVV

Fylkesutvalet vedtok torsdag at faget VG2 kjemiprosess skal opprettast ved Kvinnherad vidaregåande til hausten.

– Det er veldig kjekt at skuleeigar på politisk nivå følgjer signala frå lokalt næringsliv og kommunen for å få på plass eit nytt og spanande tilbod her hos oss, seier rektor Audun Bjelland.

Det har i fleire år vore diskusjonar om å få til ei kjemiprosesslinje ved KVV. Ein diskusjon som vart veldig meir aktuell då Søral gjekk over i Hydro.

– Hydro har hatt ein tydeleg utdanningspolitikk der dei ynskjer å ha linjer i sine nærliggjande vidaregåande skular som speilar deira interesser. Då er kjemiprosess midt i blinken, seier Bjelland.

Det betyr at VG1 TIP-elevane ved KVV frå hausten av kan søkja seg inn på kjemiprosess lokalt om dei ynskjer å gå den yrkesvegen.

– Det er ei viktig linje som vi håpar at ungdomane finn attraktivt. Det handlar òg om at ein kan søkja eit yrke der det faktisk er læreplassar, og med kjemiprosess så seier Hydro at det vil vera om lag ti læreplassar kvart år. Så det er ein trygg veg å gå om ein er motivert og interessert i å jobba innan det feltet, seier rektoren.

KVV har no litt over eit halvt år på å snu seg rundt for å få til gode modellar som gjer det til eit godt fag for elevane. I tillegg til kjemiprosess får KVV også tilbake VG2 sal, service og tryggleik.

– Vi har i år hatt ein god klasse på tolv elevar som har gått det på Vg1, så det er veldig kjekt at fylket har oppretta Vg2 igjen, sluttar Audun.