Nytt næringsområde ut på høyring

Det vedtok eit samrøystes PTM-utval førre veke. Den nye planen hadde oppstartmøte med kommunen i februar 2021. Planområdet er på om lag 50 dekar.

«Saka gjeld etablering av næringsområde som til dels ikkje er i samsvar med kommuneplanen sin arealdel. Området ligg på ein stad der det har vore tatt ut grus, men der det ikkje er aktuelt å fortsetja slik verksemd. Planen legg til rette for ei vidareutvikling og utviding av næringsområdet i Sandviklio. Primært er det tenkt å kunne ta imot overskotsmassar til førebels lagring, sortering og gjenbruk, men ein legg òg til rette for at området kan verte nytta til næring, lager og kontor», vart det opplyst i sakspapira.

Tett på bustader

Dei trafikkale løysingane vert mykje omtala i dokumentet. No er det ikkje lenger aktuelt med avkøyring til området vest for elva, og eksisterande avkøyring ved betongverket skal stengast. Etter dialog med fylket har ein blitt samde om avkøyring eit stykke aust for elva. Det kan også nemnast at fylkesvegen skal utvidast noko i svingen.

«Det er valt ei trafikkløysing som forbetrar tilhøva på fylkesvegen, og skapar ei god, felles løysing for planområdet og verksemda på nabotomta», vert det vurdert.

Planområdet ligg tett på nokre bustader. Avstand frå bustadhus til næraste byggjegrense er 15 meter.

«Naboar har i merknader til planoppstart vore særleg opptatt av støy og støv frå næringsområdet, ut frå erfaringar som er gjort med industriområdet vest for elva», står det i saksutgreiinga.

Det vert elles konkludert med at planen vil føra til relativt store naturinngrep. Samstundes meiner ein det finst potensiale for eit betydeleg tal arbeidsplassar.

Positive ting

– Det er mange positive ting med denne planen, både for industriområdet – som vi treng, og for dei trafikkale løysingane. Men det dei må vera obs på, er at området kjem tett på fastbuande naboar. Det er viktig å ta dei godt i vare, og det har dei gjort òg med støymålingar og plassering av bygningane, vurderte Stein Olav Ølvestveit (Sp).

– Med dialog går det bra, men litt ulemper blir det nok på ein slik stad, supplerte Øyvind Hardeland (Ap).