Nye vêrmeldarar i Mauranger

Kvar månad presenterer Grenda ein oversikt over vêret som var frå ti stasjonar spreidd over heile Kvinnherad. Mauranger har vore representert med ein stasjon i Austrepollen, men den har diverre slutta å fungera. Inn kjem i staden målaren til Siri og Tore Bondhus på nettopp Bondhus i Sunndal. Der er regnbegeret plassert på terrassen, vindmålaren på garasjetaket og termometeret på garasjeveggen, i skjul for den sterkaste sola.

– Det er litt artig å følgja med på dei lokale variasjonane. Til dømes ser vi at dei som bur nærare elva opplever kaldare temperaturar og meir vind. Vi ligg derimot i le bak Brekkebrotet, så vi får ikkje dalatrekken rett på oss, fortel Tore Bondhus.

Brekkebrotet er ein endemorene frå istida. Oppå der er det flatt og fint.

– Det blir sagt at han som bygde garden her etter utskiftinga ikkje ville plassera husa på flatene høgare oppe. Han ville heller byggja her, slik at dei kunne rulla høyet nedover bakkane, humrar Siri Bondhus.

Men ekteparet skal ikkje gå mange metrane frå huset før dei merkar vinden, dei også.

– Nede ved postkassa kjenner du trekken, seier Siri.

– Når vi fyrer vi i omnen, så går røyken rett opp. Når naboane på andre sida av vegen fyrer, så kan røyken leggja seg sidelengs, informerer Tore.

Klassisk vêrskilje

Regnet kan Brekkebrotet derimot ikkje gjera noko med. Men sjølv om det fell plenty med nedbør på Bondhus, er det gjerne verre andre stader.

– Det er ikkje noko regnhòla her, for det regnar meir i Austrepollen. Men det kjem mykje snø, og den blir liggjande lenge. Heilt fram til dei siste dagane har vi hatt snø samanhengande sidan før jul, kommenterer Siri.

Temperaturen blir på si side prega av den korte avstanden til Folgefonna.

– Medan det er 6 plussgrader i Rosendal, kan det vera minus 2 her. Det går eit klassisk vêrskilje ved Fureberg. Det er gjerne bart utanfor, så kjem det snø på Fureberg, og så berre aukar det på innover mot Austrepollen, analyserer Tore Bondhus.

Snøen og kulda gjer at våren kjem seint til Mauranger.

– Det er nesten éi veke i forskjell herifrå til Ænes, og så er det endå éi veke tidlegare i Rosendal. Vi kan bli overraska over kor grønt det er der og kor langt bjørka har kome, medan vi framleis traskar i snø, smiler Siri Bondhus.

Ivar Aasen

Vêrstasjonen er Tore sin. Han fekk den som gebursdagspresang frå Siri for sju år sidan. Sistnemnde hadde nok ein baktanke med gåva.

– Eg er kanskje litt over middels interessert sjølv. Den natta det var 50 meter i sekundet på Nes (natt til 28. desember), så var det berre 15 meter her på det meste. Det var nesten litt skuffande. Men det er spennande med vêr, så lenge det er trygt og godt, konstaterer ho.

Medan Siri har lang erfaring som lærar, og no er inne i sitt fyrste år på Rosendal ungdomsskule, har Tore valt Nordsjøen som arbeidsplass. For tida jobbar han på boreriggen «Ivar Aasen». Den ligg rett på sida av kollegaen «Edvard Grieg», litt nordvest for Johan Sverdrup-feltet på den såkalla Utsirahøgda. Sjølv ute i havet kan han kontrollera vêret i Sunndal.

– Ja, via mobilen kan eg følgja med på vêret heime, og det er artig å samanlikna med tilhøva vi har på feltet, seier han.

Helikopter

Tore Bondhus har til og med vore på kurs i meteorologi hjå Meteorologisk institutt. Årsaka er den ansvarsfulle jobben han har på plattforma.

– Når helikopteret skal gå frå Sola, så skal dei ha vêrmelding frå oss éin time før avgang. Og når helikopteret er på veg, må vi melda frå om trendar viss vêret er ustadig. Men det er piloten som avgjer om det er forsvarleg å landa på plattforma eller ikkje. Sikt, vind, turbulens; det er mange faktorar som spelar inn, fortel han.

I neste veke får du vita korleis januar-vêret var i Sunndal og hjå dei andre stasjonane.