Nye tiltak skapar store utfordringar: – Det er katastrofe for oss

Åge Sørensen og Gjøa vil strekkja seg langt for å ha eit tilbod til folk, men dei nye tiltaka som vart presentert måndag kveld gjer det veldig vanskeleg å få til.

– Eg er alltid optimist, men no røyner det på. Når vi no mister alkoholsalet i tillegg så er det katastrofe for oss, seier Åge Sørensen i Gjøa.

Kritisk med stengte kranar

Måndag kveld la regjeringa fram nye smitteverntiltak for andre gong på under éi veke. Då vart det også innført skjenkestopp over heile landet. Det er kritisk for restaurantbransjen.

– Alkoholsalet er veldig viktig for oss og alle andre i serveringsbransjen. Det er ikkje mange restaurantar som hadde blitt driven utan alkoholservering, seier Sørensen og held fram:

– Eg var mentalt førebudd på at det var dette som kom til å komma, så no handlar det om å hiva seg rundt for å prøva å avgrensa det økonomiske tapet så mykje som det let seg gjera.

Vil gje eit tilbod

Dei nye tiltaka føyer seg i rekkja over hardtslåande beskjedar for ein allereie pressa serveringsbransje. For Gjøa sin del har årets vinter allereie handla mykje om kanselleringar. Måndagens nyhende gjer det ikkje betre.

– Det har vore mykje no. Då vi fekk koronautbrotet her i Kvinnherad 12. november, så var det som å skru av brytaren igjen. Så kom julebordkanselleringane oppå det, og no dette. Det økonomiske bilete blir snudd opp ned over natta. Det er veldig kjedeleg, seier Sørensen.

Men sjølv om det ser mørkt ut, ynskjer Gjøa å ha eit tilbod til kundane sine så langt det let seg gjera. Dei planlegg difor for å halda fram med take away av sushi, julemat og nokon andre enklare rettar.

– Vi vil prøva å ha eit tilbod til folk, men det blir vanskeleg. Når det kjem til bestilling av andre typar mat enn sushi, dei rettane der hovudkjøkenet skal inn i bilete, så er det vanskeleg å få til om ein bestiller éin time før. Vi er då avhengige av lengre varsel og helst at det er fleire enn to som bestiller, seier han.

Avhengig av gode støtteordningar

I tillegg til det er dei avhengige av at tiltakspakkane frå regjeringa både er treffsikre og raske.

– Vi har våre faste kostnadar, og no når straumen er tre gongar så høg som den var i mai då vi opna, så vert det vanskeleg. Julebordssesongen var den som skulle bera oss gjennom resten av mørketida, og når det ikkje skjer så treng vi støtte, seier han og held fram:

– Alle trur jo at dette skal gå over, men akkurat no ser det veldig mørkt ut. Vi er på mange måtar tilbake til 12. mars 2020. No må vi finna ut kva støtteordningar som er for oss, korleis dei fungerer og kor raskt dei trer i kraft. Er dei ikkje gode nok så må vi nok stenga dørene fram til mars.