Nye prisar på alle snøggbåtrutene i Vestland
Frå 1. oktober vert det innført nye prisar og felles rabattar for Skyss sine båtruter i Vestland. For innbyggjarane i Kvinnherad vert det billegare å reisa til Leirvik, men monaleg dyrare til Flesland og Bergen.
Publisert
I ei pressemelding opplyser Skyss, som er Vestland fylkeskommune sin transportorganisasjon, at målet med endringane er å gje heile fylket like reglar og rettferdige prisar. Her er nokre viktige stikkord:
• Prisen for å reisa med båt vert lik på like lange avstandar:
Annonse
• Reiser du inntil 15 kilometer, kostar båtturen 47 kroner.
• Skal du reisa lenger, betalar du alt etter kor lang reisa er.
• Reglane for rabattar vert også dei same i heile fylket. Det inneber blant anna at barn under seks år reiser gratis, og at barnebillett gjeld til og med 17 års alder.
• Når barn reiser saman med ein vaksen, kostar barnebilletten aldri meir enn 188 kroner, uansett kor lang reisa er. Dette gjeld for inntil fire barn per vaksen.
Annonse
• Det vert også gjeve 50 prosent rabatt på returreisa når du kjøper tur-retur-billett. Dette gjeld for båtreiser på over 15 km.
Merkbart
For Hardangerfjordekspressen, som reiarlaget Rødne har kontrakten på, vert det diverre ikkje mange positive utslag. Heretter vil det med ein enkeltbillett for vaksen kosta 47 kroner å vitja Snilstveitøy, Os vil kosta 282, Flesland 423 og Bergen sentrum 536. For ein student vil det kosta 254 kroner til Flesland og 321 til Bergen.
Men i Sunnhordlandsruta er endringane meir merkbare. Prisen mellom Sunde og Ranavik vert 47 kroner for éin vaksen, same pris er det frå begge desse stadene og vidare til Leirvik. Frå Borgundøy, Fjelbergøy og Sydnes vert prisen 94 kroner til Sunde, men berre 47 til Leirvik.
Det vert derimot dyrt til Flesland og Bergen. Frå alle dei nemnde kaiane i ytre Kvinnherad må du betala 536 kroner til Flesland. Til Bergen vert prisen 602 kroner frå Fjelberg og Ranavik, og 635 frå Sydnes og Sunde.
