Nye krav til kjeldesortering frå nyåret

Det kjem fram av ei pressemelding frå Miljødirektoratet. Her står det at Noreg framleis har ein lang veg å gå når det gjeld å nå avfallsmåla til EU.

«For at Noreg skal klara å attvinne ein større del av avfallet vårt må vi kjeldesortera meir, og fleire typar avfall. Dette gjeld anten vi er heime, på jobben eller på hytta», skriv Miljødirektoratet.

Tekstilavfall

Dei nye krava gjeld papp- og papiravfall, glas- og metallemballasje og tekstilavfall. Allereie no er det krav til kjeldesortering av matavfall, plastavfall og park- og hageavfall.

Alle kommunar og verksemder som produserer hushaldsliknande avfall er omfatta av desse krava og skal leggja til rette for kjeldesortering. Hushaldsliknande næringsavfall er avfall ein kastar på jobben som liknar på det ein kastar heime, til dømes bananskal, makrell-i-tomat-boksar eller annan emballasje av plast, glas eller papp.

«Særleg kravet om utsortering av tekstilavfall og glas- og metallemballasje vil medføra behov for nye sorterings- og innsamlingsløysingar for ein del verksemder», skriv Miljødirektoratet.

Målet med dei nye krava er å auka materialattvinningsgraden for hushaldsavfall og liknande næringsavfall.