Nye hovudeigarar i Fonnafjord Næringspark

Tor Petter Stensland, styreleiar i Odda Plast Holding AS, slår fast at det er to hovudgrunnar til at dei, i lag med Rune Johan Simonsen i Multi Industrier, har investert i Kvinnherad.

– For det første ser vi på dette som ei god investering. Fonnafjord Næringspark er eit bra drive anlegg, og med reguleringsplanen som ligg føre er det også gode utviklingsmoglegheiter der, seier Stensland til Grenda.

Djupvasskaien ved næringsparken blir trekt fram som ein annan god grunn til at dei valte å investera.

– Eg kan òg sei at vi, både Odda Plast og Multi Industrier, ser på Kvinnherad som vårt felles forretningsområde, understrekar Stensland.

Nybrottsarbeid

Vidare peikar han på at Odda Plast har behov for lokale med stor takhøgd i sin produksjon, mellom anna av slamtankane dei produserer for oppdrettsnæringa.

Slamtankane Stensland snakkar om er på 200 kubikkliter og har ei høgd på 8 meter.

– Desse store slamtankane er eit nybrottsarbeid for oss. Vi har allereie levert den første, og har avtale på levera ti stykke. Den første måtte vi ferdigstilla ute då vi ikkje hadde lokale med stor nok takhøgd tilgjengeleg, men no vil vi kunne bygga dei heilt ferdige innomhus.

Når dei skal halda fram produksjonen av slamtankane på Seimsfoss, vonar dei dessutan å tilsetta fleire folk.

– Vi har allereie ein som er leiar av dette arbeidet, og reknar med at vi treng rundt 3-5 fast tilsette der totalt. Det vil seie at vi også kjem til å måtte rekruttere nokre nye, forklarar Stensland, og legg til at Odda Plast vonar å vera på plass i næringsparken på Seimsfoss i løpet av tidleg haust.