Nye fråværsreglar blir godt motteke
Regjeringa har gjort endringar i fråværsreglementet for vidaregåande skule. Både Skuleleiarforbundet og KS er svært positive til forslaget. Norsk lektorlag har også ros å koma med, medan elevorganisasjonen er svært skuffa.
Utdanningsdirektoratet kom i fjor med forslag om endringar i fråværsgrensa, der elevane skulle kunna ha meir fråvær enn dagens ti prosent, men at alt fråvær skulle telja likt uansett årsak. Det var mange høyringssvar som var kritiske til dette, og det endelege reglementet har gått tilbake på dette punktet.
Fråværsgrensa på ti prosent i kvart fag vart innført i 2016, og gav god innverknad på oppmøtet i norske klasserom. Samstundes vart det ein svært stor pågang på fastlegar av alle elevane som ville dokumentera sitt fråvær kvar gong dei var småsjuke. Regjeringa forsøker no å løysa desse utfordringane.
Annonse
Eigenmelding
– Det er viktig at elevane møter opp på skulen. Det bidreg til at dei lærer meir og betre, og får ta del i fellesskapen på skulen. Dei grepa me gjer no vil letta byrden på fastlegane betydeleg, og sikra at dei brukar tida på dei pasientane som faktisk treng hjelp, seier kunnskapsminister Kari Nessa Nordtun på regjeringa si nettside.
Skulane skal nemleg ta i bruk eigenmeldingssystemet for å få bukt med fråværsdokumentasjonen. Fram til eit ti prosents fråvær skal elevane kunna levera eigenmelding, som i arbeidslivet.
Nordtun får gode tilbakemeldingar frå fleire høyringsinstansar. Styreleiar i KS, Gunn Marit Helgesen, skriv i ei pressemelding:
Annonse
– Evalueringar viser at fråværsgrensa har bidrege til betydeleg meir nærvær på skulen, og KS er glad for at denne vert vidareført.
Skuleleiarforbundet er også positive, og trekkjer fram ordninga med eigenmeldingar:
– Innføringa av ei kvote for eigenmelding ved sjukefråvær er eit positivt tiltak som vil avlasta fastlegane og samstundes gje elevane verdifull erfaring med eit system dei seinare vil møta i arbeidslivet, seier Stig Johannesen, forbundsleiar i Skuleleiarforbundet.
Elevorganisasjon: - Utruleg kjipt
Lektorlaget konstaterer at ei fråværsgrense på ti prosent har ført til at fleire elevar er på skulen, og får betre karakterar. Samstundes etterlyser dei fleire grep, som at foreldre bør levera eigenmeldinga for elevar under 18 år.
– Å skilja mellom elevar under og over 18 år når det gjeld eigenmelding, vil gjera foreldre merksame på fråvær. Me meiner dette ville ha vore eit godt grep for å motverka fråvær, seier Helle Christin Nyhuus, leiar i Lektorlaget.
Annonse
Elevorganisasjonen har i alle år vore svært kritiske til at fråværsgrensa er på ti prosent, og ville helst hatt ei høgare grense.
– Det er utruleg kjipt. No kan du stå i fare for å stryka viss du er uheldig og blir sjuk tidleg på hausten og brukar opp heile kvota, for så å vera uheldig og forsøv deg på våren, seier leiar i Elevorganisasjonen Madelen Kloster til Aftenposten.
I det nye reglementet får rektor høve til å utøva skjønn ved fråvær opp til femten prosent. Dette får gode skussmål frå Skuleleiarforbundet.
«Dette gjev skuleleiarar naudsyn fleksibilitet til å tilpassa vurderingar til enkeltelevars situasjon og behov», står det å lesa i pressemeldinga deira.
Skuleleiarforbundet legg til at regjeringa sitt nye reglement viser at dei forstår skulen og elevane sine behov.
Slik blir fråværsreglane frå og med neste skuleår (regjeringen.no)
| Elevar skal levera eigenmelding til skulen for sjukefråvær opp til fråværsgrensa på ti prosent. Fråvær på over ti prosent i eit fag, må dokumenterast med attest frå helsepersonell. |
| Det blir lettare for elevar å ta førarkort for bil ved at fråvær som skuldast teoretisk og praktisk førarprøve, blir inkludert i lista over unntak frå fråværsgrensa. I dag er det berre unntak for deler av den obligatoriske køyreopplæringa. |
| For å forenkla og avbyråkratisera, skal fråværet berre reknast av på slutten av skuleåret i staden for to gonger i løpet av skuleåret som i dag. Det er enklare for skulane, og kan motivera elevar som har høgt fråvær til jul til å redusera fråværet sitt til sommaren. |
| Visse former for fråvær, til dømes politisk og religiøst fråvær, skal framleis få unntak frå fråværsgrensa. |
| Fråvær skal framleis førast på vitnemålet. |
| Dei som har kronisk sjukdom eller plager som gjev høg risiko for fråvær, skal framleis kunna bruka eigenmelding i kombinasjon med legeattest. |
| Rektor skal framleis kunna bruka skjønn ved fråvær opp til 15 prosent av timetalet i eit fag. Då kan eleven framleis få karakter dersom grunnen til fråværet gjer det klart urimeleg at fråværsgrensa skal gjelda. |
