Nye ferjekaiar: Vil ta initiativ til møte
Ordførar Vegard Bjørnevik (H) stadfestar at han har diskutert nye ferjekaiar med leiinga i Stord kommune, og lovar at han vil syta for framdrift i saka.
Publisert
Sist oppdatert
Den nye koalisjonen i Stord kommune består av Frp, Høgre, KrF og Venstre. Då dei fredag ettermiddag presenterte styringsplattforma si, avslørte ordførar Sigbjørn Framnes (Frp) at han og varaordførar Øyvind Kyvik (H) har vore i kontakt med ordføraren i Kvinnherad for å finna ei løysing for innkorting av ferjesambandet mellom kommunane. Konkret ved å byggja ferjekaiar i Djupavikjo ved Leirvik og Klosterneset på Halsnøy.
Til Grenda stadfestar vår nye ordførar, Vegard Bjørnevik (H), at det er han som har delteke i desse samtalane.
Annonse
– Eg har ein partikollega som er varaordførar på Stord, og vi har tett dialog om både stort og smått. Den siste tida har vi diskutert moglegheitene for å sjå på ei innkorting av ferjestrekninga, dette i samband med at dei har gåande eit veldig spennande prosjekt for å gjera Stord større, fortel Bjørnevik.
Dialogmøte
Dette prosjektet går ut på å byggja ein ytre molo ved Leirvik. Djupavikjo, som no er nemnt som ny ferjestad, ligg utanfor dagens molo, men innanfor den moglege nye. Nærare bestemt på sørsida av innseglinga til Leirvik. I tillegg til ferjekai, vurderer Stord kommune å etablera cruisehamn her.
Vegard Bjørnevik er klar for å jobba vidare med ferjekaisaka.
Annonse
– Vi må ta i mot alle positive signal og initiativ frå nabokommunane våre, og drøfta det skikkeleg. Dessutan står det i den nye samarbeidsplattforma vår at vi skal jobba for innkorting av ferjesambandet mellom Kvinnherad og Stord, seier Bjørnevik.
– Kva trur du om framdrifta i prosessen?
– Eg håpar vi skal få god framdrift. Eg skal snakka meir med Sigbjørn Framnes, og veit også at han allereie har teke kontakt med fylket for å skipa til eit dialogmøte om saka, opplyser Kvinnherad sin ferske ordførar.
