Nye eigarar i Zinus
Singapore-baserte Eastern Pacific Shipping Ventures (EPS Ventures) og Nysnø Klimainvesteringar går saman om å investera 50 millionar kroner i det Kvinnherad-relaterte selskapet Zinus.
Publisert
Zinus, som vart etablert i 2018 og er heimehøyrande på Rubbestadneset, er ein leiande aktør innan landstraum og ladeløysingar for maritim sektor. No har dei fått to nye aktørar inn på eigarsida.
– Dei nye medeigarane tilfører betydeleg styrke til selskapet vårt, noko som gjer det mogleg for oss å akselerera veksten og vidareutvikla berekraftige maritime teknologiar, seier Endre Eidsvik, administrerande direktør i Zinus, i ei pressemelding.
Annonse
Denne retta emisjonen på 50 millionar kroner sikrar EPS Ventures, investeringsarmen til Eastern Pacific Shipping (EPS), og Nysnø plass som aksjonærar i Zinus. Begge investorane vil også ta sete i selskapet sitt styre. Dei eksisterande aksjonærane – LOS Gruppen, Eviny Ventures og DSD – vil behalda sine aksjepostar og halda fram å støtte selskapet sin visjon og vekststrategi.
Meir enn ti land
Zinus skriv at tilgang til landstraum gjer det mogleg for skip å slå av fossildrivne motorar under hamneopphald, noko som reduserer CO₂-utsleppa betydeleg. Utviding av ladeinfrastrukturen støttar også bruken av hybride og heilelektriske fartøy for transport av både last og passasjerar, med minimale eller inga klimagassutslepp.
– Våre nye investorar tilfører nødvendig kapital og kompetanse for å driva innovasjon og vekst, samtidig som dei deler vårt engasjement for å fremja landstraumløysingar i skipsfarten. Med deira omfattande maritime ekspertise og globale nettverk er vi godt posisjonerte for å akselerera vår internasjonale vekst. Allereie etablerte i meir enn ti land med våre leveransar, held vi fram med å introdusera våre berekraftige teknologiar i nye marknader over heile verda, seier Endre Eidsvik.
Annonse
– Vi planlegg å rekruttera 15 nye tilsette i 2025, og utvida teamet frå 50 til 65 for å støtta og styrka denne veksten, legg Eidsvik til.
