Nydelig dag for hundeutstilling

64 hundar var påmeldte, og om lag det same talet menneskjer møtte opp for å sjå utstilling og kåring av to grå og 62 svarte elghundar.

– I fjor var vi litt fleire, men dette var eigentleg passeleg med tanke på tida. Vi har ein bra dommar som tek seg ekstra god tid i år, og det er kjekt å få ei grundig vurdering, fortalde nestleiar i Hordaland Elghundklubb Anita Lie.

I havet av hundar og menneskje la bladfyken merke til ein ting. Om trent alle hundane var svarte.

– Her har vi kvart år flest svarte, sjølv om det ikkje er ein så stor rase. Reiser ein austover er det flest grå elghundar, kunne Lie fortelja.

Etter ein kort innføring i korleis hundeutstillingar fungerer, kunne denne nyinformerte bladfyken følgja godt med på årets kåring. Ikkje berre var det pels og gange som vart dømt, men òg skulderhøgde og kjeve.

– 45 cm, feminin tispe. Vel skåre hovud med god hals og overlinje, ok hale men litt på sida. Enno litt grunn underlinje, ordinær beinstamme, enno smal i front og noko utsvinga forpoter. Utmerka hårlag og temperament, sa dommar John Smedbakken om Lie sin hund «Børvelias Yrja».

Sosialt og kjekt

Det er ikkje berre kåringa folk og hundar reiser på hundeutstilling for. Her kan ein treffa andre med like interesser og like hundar.

– Det er sosialt og kjekt og ein treff gjerne dei same folka år etter år. Eg har jo vore på treffet her i Kvinnherad nokre år og treff både kjente og ukjente, fortalde Stein-Ole Lekven.

Han hadde tatt turen frå Os ilag med eit par av hundane sine, deriblant hunden Mira på 3 1/2 år. Til saman har han tre elghundar i heimen.

– Det er sosialt for hundane å vera her òg, dei får øva seg på å vera rundt andre hundar som er konsentrerte. Når eg går tur med dei heime skal hannen ofte passa på dei to tispene, og då kan han lett gira seg opp når det kjem andre forbi. Han må læra seg at hundar kan gå forbi utan at vi skal bry oss om det, og det får han øva på her, fortel Lekven.

Den svarte elghunden er ein av sju norske hunderasar, og vert rekna som veldig eksotisk utanfor Norden. Den oppsto på 1800-talet og er ein god jakthund.

– Denne rasen er mest kjent for å kunna ta lukta av til dømes ein hjort. Når eg går tur med mine i terrenget har eg dei ofte på ein fem meter langline, og då kan eg sjå kor instinktet vaknar i dei, det er ganske fascinerande, fortalde Lekven.

Men i hundeutstillinga er det ikkje jaktinstinktet som blir dømt. Det er skulderhøgde, kjeve, rygg, hale, øyre, bein, korleis den spring og kor mykje kvitt den har i pelsen som skal til pers då.

Denne dagen var det 28 hundar som fekk «Excellent», som er det beste resultat etter dømminga.

«Pia av Eikjevellen» som er eigd av Iris Aase vann «best i rase» medan «Børvelia´s T-Balto» eigd av Jarand Øyna vann best i «motsatt kjønn». Alle resultat kan du sjå her.