Ny verd i samfunnshuset
Borna i Rosendal FUS Barnehage fekk stor glede av at Rosendal samfunnshus har gått til innkjøp av nye møblar. Utav store innkjøp blir det nemleg ditto emballasje.
Publisert
Sist oppdatert
Då Grenda stakk nasa innom Rosendal si storstove var eit knippe av dei minste borna frå barnehagen på oppdagingsferd i eit heilt nytt landskap. Bak døra til ei kvar eske gøymde det seg ein mellombels ny heim.
– Her bur eg, smilte Martine, og fekk straks to små sambuarar; Sigrid og Erle.
Annonse
Og det var ikkje berre meir enn nok plass i dette herberget, det var herberg så langt auga kunne sjå!
I det enorme mylderet av esker var det kanskje ikkje så rart at Britt Fredheim Enes plutseleg forsvann frå forsamlinga. Borna var heldigvis raskt på pletten, og det gjekk ikkje lang tid før dei oppdaga Britt, fullstendig gøymd i ei av eskene.
Med årets BlimE-sang på full guff frå høgtalarane, var det retteleg fest i samfunnshuset fredag føremiddag. Scena var dessutan open, noko fleire av borna nytta seg av. Dansen kunne dei tydeleg, og boltreplassen vart tydeleg sett pris på.
Like før føremiddagsmaten skulle hentast fram, hadde Marit Friheim eit gledeleg hjartesukk å koma med.
Annonse
– Eg er heilt imponert over alt dei får til her på samfunnshuset, det er blitt så fint her og dei fortener verkeleg all skryt dei kan få. Det at dei tenkte på barnehagen når dei hadde pakka ut møblane, det finst ikkje betre rekruttering av nye brukarar av huset enn det!
