Ny utestad fekk skjenkeløyve: – Veldig positivt

Spritz AS søkte i midten av november om skjenkeløyve i lokala der det tidlegare var bensinstasjon og no sist Halsnøy Café og Restaurant. Allereie den 5. desember kom saka opp i Formannskapet, dette for å kunna gje firmaet moglegheita for å opna 17. januar 2025 som dei har ynske om.

«Spritz vil i all hovudsak ha 20-års aldersgrense for å lettare kunna handheva alkohollova. Det vil kun unntaksvis vera arrangement med 18-års grense. Spritz AS skriv i søknaden sin at dei vil syta for nødvendig vakthald for å hindra mindreårige tilgang til lokalet», vart det opplyst i sakspapira.

Det vart lagt til at bruksendring frå bensinstasjon med gatekjøken til restaurant/gatekjøken og ubemanna bensinstasjon er stadfesta.

«Når det gjeld uteområdet som er omsøkt, vert dette etter avtale med søkjar ikkje omhandla i denne saka. Ny sak som omhandlar løyve for uteservering vert lagt fram i eit seinare politisk møte», heiter det.

Veldig positivt

Kommunedirektør hadde ikkje registrert noko som gjorde at søknaden ikkje kunne innvilgast, og innstilte på godkjenning.

– Veldig kjekt at det kjem aktivitet i dette lokalet. Veldig positivt, så dette må vi stø opp om, sa Ove Lemicka (Frp). Det enda med eit samrøystes vedtak.

Skjenkeløyvet gjeld for all alkoholhaldig drikk fram til og med 30. september 2028. Innandørs skjenkeområde er på 140 kvadratmeter og har 80 sitjeplasser. Godkjend skjenkestyrar er Marielle Sjo, og reservestyrar er Fredrik Berntsen. Skjenketida er til klokka 01.30.

Spritz har allereie fått booka inn dei fyrste arrangementa. Til dømes inviterer KNS Ung til quiz med Ørjan Bakke som quizmaster den 24. januar.