Ny runde om Onarheim kraftverk

I midten av oktober sa politikarane nei til SKL sitt endringsforslag for utbygginga av Onarheim kraftverk. Men siste ord var ikkje sagt, viser det seg, for no kjem saka i retur.

 

SKL har fått løyve til å byggja Onarheim kraftverk ved Husnes. I konsesjonen vert det kravd borehol opp mot Bremstølen, men i sommar søkte SKL om i staden etablera ei nedgraven røyrgate. Dei ynska også å forlenga anleggsvegen heilt opp til inntaket. Formannskapet skulle berre gje uttale i saka, og den 15. oktober rådde dei med sju mot to røyster til å ikkje gje løyve til endringa, grunngjeve med inngrep som vil redusera naturverdiane endå meir.

I formannskapet på torsdag bringa ordførar Hans Inge Myrvold (Sp) saka på banen igjen.

– Det har kome ein del reaksjonar til kommunen i ettertid, fordi det var ein del vesentlege moment som ikkje vart tilstrekkeleg belyste i saksframstillinga. Ordførar er oppteken av at vi skal ha ei tilstrekkeleg saksbehandling, og eg spør difor om saka bør handsamast på nytt, sa han.

Myrvold opplyste at desse momenta var knytt til drikkevassforsyninga og -sikkerheita. Kommunedirektør Ragnhild Bjerkvik skaut inn at ei betre utgreiing kunne ha sett saka i eit anna lys. Ho la til at NVE har akseptert å utsetja høyringsfristen.

 

Må ikkje ha prestisje

Ove Lemicka (Frp) støtta ei ny handsaming.

– Vi må ikkje ha prestisje knytt til dette. Når det er ein del moment som det ikkje er gjort godt nok greie for, eller eventuelt gjort feil, så må ein kunna fremja saka på nytt. Det er ikkje noko problem, sa han.

Leif Sverre Enes (H) var samd.

– Det burde òg vore presisert at Kvinnherad kommune er involvert i prosjektet med kring halvparten, supplerte han.

Hege Lægreid Røssland (SF) reagerte derimot sterkt på innspelet om ein ny runde.

– Både drikkevassforsyninga og dei økonomiske konsekvensane var belyste i saka. Eg oppfattar dette som ein omkamp frå administrasjonen si side og eventuelt nokon som sit i formannskapet. Dette er ikkje greitt, for å seia det mildt, kommenterte ho.

Hans Inge Myrvold vedgjekk at det stemde at sakspapira omtalte alle desse momenta.

– Men vi må vera sikre på at vi har konsekvensane for 7.000 vassabonnentar klart for oss, utdjupa han.

 

Formalfeil

Hege Lægreid Røssland følgde opp med å hevda at det var ein formalfeil å ta saka uanmeldt opp over bordet. Mellom anna viste ho til at ho sjølv og to andre var inhabile då saka var oppe sist, og ein hadde no ikkje fått høve til å henta inn vararepresentantar.

– Dette kan ikkje formannskapet handsama, vurderte ho. Men Røssland la til at ordførar ifølgje kommunelova sjølv kan bestemma å fremja ei slik sak uavhengig av formannskapet.

– Eg synest det er flott at ordførar høyrer med formannskapet viss det er ei sak som bør takast opp att. Det er ikkje kritikkverdig i det heile. Men det som ikkje er korrekt, er at folk som var inhabile i saka deltek i ordskiftet no, kontra Ove Lemicka.

Gunnar Våge (Sp) sa seg litt overgidd over Røssland sitt engasjement.

– Vi som var inhabile sist, bør ikkje seia så mykje verken frå eller til, rådde han til.

Dermed kan ei rekna med at saka kjem opp att om nokre veker.