Ny rettleiar skal sikre oppfølging av kreftpasientar i kommunehelsetenesta
Sektorleiar i omsorg, helse og sosial Åslaug Brænde meiner det er naturleg at alvorleg sjukdom opptar og rører ved polititarar og beslutningstakarar.
Publisert
Sist oppdatert
Dette trekkjer ho fram som grunnen til at den nye rettleiaren pakkeforløp for kreft er kome. Brænde viser også til at det er ei politisk og administrativ semje om at kreftomsorga i kommunen skal styrkast.
«I Kvinnherad har det vore verbalpunkt i kommunestyrevedtak på å styrke kreftomsorga. Dette meiner vi at vi gjer no ved å samle saksbehandling i ei vurdering- og koordineringsavdeling som vil vera den eine døra inn for innbyggjarane til både søknadar på tenester, behovskartlegging og rettleiing, med meir.» skriv Brænde i ein e-post til Grenda.
Annonse
Gjennom koordineringsavdelinga vil kreftråka og andre få kontakt med personale innan den kommunale kreftomsorga som kan rettleie og følgje opp dei behova som det blir søkt hjelp til.
Fleire tilbod gjennom Frisklivssentralen
Vidare har kommunen ein plan for å trekke fleire tilbod inn i Frisklivssentralen, til dømes retta mot grupper som lever med sjukdom eller har vore gjennom alvorlig sjukdom.
«Fellesskap med andre og livsmeistring er nøkkelpunkt, sjølvhjelpsgrupper og nettverk er noko som fungerer godt for menneske som har vore gjennom eit sjukdomsforløp. Vi har mange flinke helsearbeidarar som jobbar med dei sjukaste innbyggjarane som treng naudsynt helsehjelp.» skriv Brænde, før ho sluttar av.
Annonse
«Når det kjem til det å leve livet med sjukdom må vi jobba for tilbod som støttar opp om det friske og som gir auka hjelp til livsmeistring. Løysinga må vera å byggje fellesskap og møteplassar, og støtte opp om dette som kommune og lokalsamfunn.»
