Ny rekord for tredje år på rad

– Me har oppteljing i besøksboka kvart år, og no er det faktisk rekord for tredje året på rad. Berre på nyttårsaftan var det 77 folk som var på tur der oppe, fortel Bjørn Heimvik i Turstiar Sunde.

I alt vart det registrert 20 492 besøk i 2024. Turstiar Sunde har som kjent gjort eit stort arbeid med å utbetra stiar opp mot åsen. I året som var, vart det laga eit nytt utsiktspunkt på Gråhammar, og det vart gjort ein ekstra innsats med stien opp frå KVV. Dei ser no at den stien vert mykje brukt.

– Ja, det var veldig gjørmete der før, men me har grøfta og grusa og drenert, så no er det fint å gå der. Og så kan ein jo koma opp frå andre kantar òg, det er mange moglegheiter opp til åsen, utdjupar Heimvik.

Friluftslivets år

I haust fekk Turstiar Sunde Folkehelseprisen i Hordaland, utdelt av Nasjonalforeningen for Folkehelse. At gjengen på omtrent 30 frivillige gjer ein god innsats for folkehelsa, er det nok ikkje mykje tvil om.

– Me har i snitt 50 dugnadstimar i veka, så det blir jo ein del. Men litt av suksessen vår er at folk er med på arbeidet når det passar, ein treng ikkje vera med på alt, forklarar Bjørn Heimvik.

Den Norske Turistforening markerer 2025 som Friluftslivets år. Dei skriv i ei pressemelding at dei vil inspirera folk til å prøva nye friluftsaktivitetar, anten dei har mykje eller lite erfaring i naturen.

– DNT arrangerer kvart år tusenvis av små og lengre turar, og i 2025 blir det ekstra mange organiserte aktivitetar og fellesturar. Samstundes vil me slå eit slag for alt det ein kan gjera i naturen på eigen hand og saman med familie og venner, seier Louise Brunborg-Næss som er prosjektleiar for Friluftslivets år i DNT.

Auke under pandemien

Ho presenterer ei liste med forslag til korleis ein kan bli meir aktiv i naturen. På lista står mellom anna å læra seg nokre trygge sopptypar ein kan plukka, å sova under open himmel ei natt, invitera vener ut på bål-tur, og å overnatta på ei DNT-hytte.

Bjørn Heimvik meiner bestemt at fleire og fleire har som vane å koma seg ut i naturen.

– Ja! Me såg ein stor auke under pandemien. Då var det brått 10-15 prosent fleire besøk som vart registrert i boka. Og så har det berre auka etter det også. Og me ser mange gjengangarar, folk som er på åsen 200 gonger i året, til dømes.

Både besøksrekorden og all den gode tilbakemeldinga er motiverande for dugnadsgjengen.

– Det er stor stas at så mange brukar turstiane, det synest me er veldig kjekt, avsluttar Bjørn Heimvik.