Ny prisrekord igjen

NVE har kome med deira faste oppdatering kvar veke om straumprisar, kraftproduksjon og fyllingsgrad. Denne gong om veke 30, altså den siste veka i juli.

«I Sørvest-Noreg fekk vi nok ein rekordhøg vekepris på 322 øre/kWh i veka som gjekk, ein auke på 5 prosent frå veka før. I Søraust- og Vest-Noreg auka vekeprisen med 13 prosent. Kraftprisane her er likevel klart lågare enn i Sørvest-Noreg. Flaskehalsar i det norske kraftnettet gjer at vi får prisforskjellar også mellom områda i sørlege Noreg. Sørvest-Noreg blir i sterkare påverka av kraftprisane på kontinentet enn Søraust- og Vest-Noreg. Prisane i Nord- og Midt-Noreg heldt seg framleis på eit svært lågt nivå, med ein vekepris på 2 øre/kWh», opplyser NVE.

Vindkraft

Mykje vindkraftproduksjon både i Norden og på kontinentet bidrog til reduserte prisar i starten av veka. Men i siste halvdel av veka fall vindkraftproduksjonen.

«Samstundes var det ein nedgang i vasskraftproduksjon i sørlege Noreg frå dei føregåande vekene. Låg vindkraftproduksjon kombinert med reduksjon i vasskraftproduksjonen bidrog til å løfta prisnivået og trekkja opp snittprisen over veka. I Sørvest-Noreg viser førebelse tal at samla vekeproduksjon av regulerbar vasskraft var den lågaste hittil i år, og ligg lågt for årstida. Nedgangen i den regulerbare vasskraftproduksjonen kan tyda på at vasskraftprodusentane sparar på vatnet og verdset det høgt», analyserer NVE.

Redusert innanlands kraftproduksjon bidrog til mindre eksport i veka som gjekk.

«Førebelse tal viser at sørlege Noreg totalt fekk ein nettoimport på 61 GWh. Dette er ein reduksjon på 263 GWh frå veka før. Normalt har vi ikkje brukt å sjå nettoimport over ei veke i sørlege Noreg på denne tida av året», heiter det.

Fyllingsgrad

Ved utgangen av veke 30 var fyllingsgrada i norske magasin på 66,5 prosent.

«Til samanlikning er medianverdien for fyllinga på tilsvarande tidspunkt 74,9 prosent for åra 2002-2021. Gjennom veka auka magasinfyllinga med 1,3 prosenteiningar. Høgast magasinfylling hadde Midt-Noreg (NO3) med 88,4 prosent, mens Sørvest-Noreg (NO2) hadde lågast fylling med 49,3 prosent», skriv NVE.