Ny pipebrann - kjem med oppmoding
Kvinnherad brann og redning er på staden.
Like over klokka 10 måndag meldte 110 Vest om ein pipebrann på Nedre Sæbø på Halsnøy. Kvinnherad brann og redning var fort på staden, og då stod det flammer ut av pipa, fortel vakthavande Thomas Hallquist.
– Vi sende både Halsnøystasjonen og vaktlaget frå Husnes. Vi har kontroll på brannen no, men det er snakk om ei gammal teglsteinspipe, og temperaturen er stigande utpå pipa. Derfor blir vi på staden ei stund for å forsikra oss om at det ikkje spreier seg, legg han til.
Annonse
Kjem med oppmoding
Det har blitt ein travel start på veka for Hallquist og resten av brann-gjengen, med mellom anna to pipebrannar same morgon.
– Det er rette sesongen for slikt. Mange av pipebrannane kunne ha vore unngått, seier vakthavande, som samstundes kjem med ei oppmoding.
– Bruk tørr ved, mindre vedkubbar og riktig trekk, fortel han.
Annonse
Hallquist viser elles til informasjonen som Kvinnherad brann og redning har delt på kommunen sine heimesider.
Der kan ein mellom anna lesa at dersom uhellet først er ute, er det om og gjera å stenga alle omnsventilar og luker. Unntaket er opne peisar, her skal ikkje spjeldet stengast dersom det er fyr i peisen.
