Ny ordning skal stimulere til trygge skulevegar og nærmiljø

Statens vegvesen inviterer alle kommunar i landet til å søke om tilskot til tiltak som bidreg til dette. Ordninga, som er ny av året, er ein del av Barnas transportplan i Nasjonal transportplan 2022-2033.

– Tilskota i tryggare skulevegar og nærmiljø støttar opp under regjeringa sitt mål om at fleire barn skal sykle eller gå til skulen. I statsbudsjettet for 2022 vart det løyvd 20 millionar kroner til ordninga, heiter det i ei pressemelding frå samferdselsdepartementet.

Høg prioritet

Samferdselsminister Jon-Ivar Nygård er glad for at det no kjem ei ordning som skal stimulere til trygge skulevegar og nærmiljø.

– Langsiktig arbeid med å redusere trafikkulykker har gitt spesielt gode resultat når det gjeld barn og unge. I 1969 vart 103 barn drepne i trafikkulykker. I 2019 var det for første gang ingen barn som blei drepne i trafikken. I fjor omkom tre barn i trafikken, noko som viser at arbeidet framleis må ha prioritet, seier samferdselsministeren.

Ordninga skal mellom anna stimulere til å etablere Hjartesoner, altså mest mogleg bilfrie soner, rundt skular.

Andre døme på tiltak som kan søkast støtte om er til dømes sykkelparkering, etablering av drop-soner, «snarvegar» som er viktige for trygg ferdsel for barn i tilknyting til skular og nærmiljø, belysning i kryssingsstader for fotgjengarar og syklistar, lokale kampanjar, refleksvestar, med meir.

Fristen for å søkje er 1. mars.