Ny ordning for koronatesting

Frå onsdag 29. september vert det endringar for koronatesting i Kvinnherad. Det vert då plassert ut testar for heimetesting i merka boksar, utanføre alle helsesentera i kommunen. På kveldar og i helgene kan ein henta seg ein test ved legevakta på Husnes i opningstida.

«Hurtigtestane skal nyttast dersom ein har milde symptom på luftvegsinfeksjon, eller om ein er nærkontakt til nokon som er koronasmitta. Dette gjeld både fullvaksinerte, delvaksinerte og ikkje-vaksinerte. Ved negativt resultat og vedvarande symptom bør testen gjentakast.» skriv kommunen på sine nettsider.

Testane kjem med brukarrettleiing, og for å finne ut korleis testen skal takast, viser kommunen til ein YouTube-video.

Vidare vert det understreka at alle som får symptom på covid-19 skal halde seg heime medan dei ventar på prøvesvar. Dersom svaret på prøven er negativt, kan ein gå på skule og jobb igjen når allmenntilstanden er god. Ved negativt svar er det heller ikkje behov for å melda dette til nokon.

Om svaret på testen derimot er positiv, skal den som er testa isolerast og bestilla PCR-test på helsesenteret. Alle positive testar skal bli bekrefta med prøve tatt hos fastlege, og resultat frå sjølvtestar kan ikkje bli brukt som dokumentasjon i koronasertifikat.

Med den nye løysinga gjeld det framleis at ein ikkje skal føreta seg noko som kan påføra andre smitte: «Er du sjuk skal du IKKJE henta test, men få ein annan til å henta for deg. Barn og unge får tilbod frå skulen om å ta sjølvtest heime, som alternativ til karantene, dersom nokon i klassen/avdelinga blir smitta av korona.»

Dersom ein treng test i samband med feriar eller liknande, skal ein vende seg til private aktørar som har testtilbod, og ein må i så fall dekka kostnaden for testing sjølv.