Ny-opning i Uskedalen

Sjølv om butikken allereie har vore open att i fleire dagar, så var det mange som tok turen innom for å få med seg markeringa. Det vrimla av folk, både dei som var der for å få kake, og dei som var der for å handla samstundes.

- Me er veldig nøgde med resultatet, og håpar sjølvsagt at kundane blir like nøgde som oss med den nye butikken, fortel ei smilande dagleg leiar, Gunn Mari Moberg.

Mange å takka

Mange av dei som er til stades samlar seg rundt Moberg då ho ringer i bjølla for å ynskja alle velkomne til den nye butikken. Blant dei var Regionsjef for heile vestlandet, Inge Birkeland, og driftssjef Johan Ringedal.

Moberg takka alle som har vore involvert, og det var fleire som vart nemnde med namn. Blant dei var driftssjefen, som får både takksemd og æra for å ha losa alle trygt gjennom det heile.

Ei anna som får ein spesiell takk er Hjørdis Nilsen Holgersen, mor til desse to søstrene, Gunn Mari Moberg og Kjersti Nilsen Børve, som driv butikken saman.

– Tusen takk for at du har støtta oss, og heia på oss gjennom alt, seier Moberg til mor si, som står midt mellom dei to døtrene sine.

Til slutt nemner ho dei tilsette, som har gjort ein formidabel innsats og som har gjort mykje og endå meir til. Meir enn dei faktisk trengde å gjera, i fylgje Moberg sjølv.

Driftssjefen sjølv derimot, ville ikkje ta i mot for mykje av æra, og nytta høve til å senda skrytet attende til dei tilsette.

– Alt har gått veldig bra, det har faktisk ikkje vore noko problem i det heile. Dei tilsette har gjort ein fantastisk innsats, og har hatt kontroll på alt. Det har vore ein fryd å vera med på, seier han svært nøgd.

Overraska

Medeigar Kjersti Nilsen Børve, seier seg einig med Moberg, men tykte det var vanskeleg då dei måtte stengja.

– Det var lenge å ha stengt, og det tykte eg var fælt. Eg likar best å vera ute i butikken, prata med kundane og hjelpa til. Men då alt vart kaos, var det utfordrande å driva butikk. Mange av hyllene var tomme, og folk fann ikkje det dei trengde, fortel Nilsen Børve.

– I tillegg var det mykje administrativt, og det likar eg ikkje, ler medeigaren.

Salet gjekk kraftig nedover medan oppussinga føregjekk, men tok seg kjapt opp att etter opninga.

– Ja, me er i grunn ganske overraska over kor bra me har seld etter opninga, innrømmer Nilsen Børve.

Nekta å ta i mot

Ein annan sak, som har vore viktig for butikken lenge, er at alle skilt i butikken skal vera på nynorsk, noko dei fortset med også i den nye butikken, får me veta.

– Det er noko som har vore viktig for oss lenge, at det må vera på nynorsk. Dei prøvde seg faktisk med å senda oss skilt på bokmål, men det nekta me å ta i mot, fortel Nilsen Børve.

Også mållaget har bite seg merke i den vetle Spar-butikken. I 2014 fekk dei målblomen, same året som dei tok i bruk dei nynorske skilta.

– Dagens ros går til Spar Uskedalen som held fram med nynorsk skiltmal på all hovudskilting i butikken, skriv mållaget på sine Facebook-sider.