Ny mellombels direktør på plass ved Rosendal Fjordhotel: – Semje om å avslutte arbeidsforholdet
I dag, onsdag 21. september, vart dei tilsette ved verksemda gjort kjend med at Christian Lyngholm går av som hotelldirektør. Hans mellombelse erstattar er allereie på plass.
Publisert
Sist oppdatert
Ole Kristian Johannessen i West Coast Invest, selskapet som eig hotellet, stadfestar dette.
– Me i styret har blitt samd med Christian om å avslutte arbeidsforholdet hans. Partane har eit ulikt syn på korleis drifta skal gå føre seg og korleis framtida for hotellet skal vera, seier han.
Annonse
Christian Lyngholm vart tilsett i jobben 1. mars i år.
– Det har vore ein stor opprydding på hotellet, og me har implementert gode rutinar og bygt opp eit heilt nytt team. Eg er nøgd med å oppnå GPTW sertifisering som ein god arbeidsplass. Min jobb hos Rosendal Fjordhotel er fullført, og eg startar i ny jobb 1. oktober. Eg ønskjer både eigar og mine kollegaer lukke til vidare, skriv Lyngholm i ein sms til Grenda.
Seniorrådgjevar inn som hotellsjef
Den som går inn i rolla som mellombels hotellsjef er Håkon Gaarder-Larsen (51), seniorrådgjevar i Hotelia.
Annonse
Gaarder-Larsen har over ei årrekkje jobba som rådgjevar og konsulent for hotell-, restaurant og reiselivskundar. Han har også vore innom Rosendal Fjordhotel den siste tida, som coach for avtroppande Lyngholm.
– Hotelia har eit nettverk og eit rekrutteringssystem som me vil nytta oss av når me skal tilsette ny hotelldirektør, forklarer Johannessen før han held fram:
Skal vera ei hjørnesteinsbedrift
– Det blir viktig for oss å finne den som er best eigna til å dra hotellet vidare i den retninga me ønskjer.
– Og kva retning er det?
– Me har mellom anna ei rekkje planar og tiltak som me ønskjer å setja i gong med no når det blir rolegare i slutten av september. Nokre av tiltaka må me søkja om, så me veit enno ikkje kva som blir godkjent, men me er i prosess.
Annonse
Johannessen held fram med å stille nokre retoriske spørsmål. Styret ynskjer truleg at den neste direktøren skal samarbeide med dei om å skriva to strekar under felles svar:
– Korleis skal me marknadsføre oss, kva kundegrupper skal me venda oss mot, korleis kan me auke standarden på hotellet og kor skal me putte inn pengane? Det er viktig å setje ein standard for korleis kundane skal ha det og for korleis arbeidskvardagen til dei tilsette skal vera.
Skal bretta opp ermene
Tilbakemeldingane frå kundane denne sesongen har vore veldig gode, noko som ifølgje Johannessen tyder på at dei tilsette gjer ein flott jobb.
– Dei står verkeleg på, og det er god stemning blant personalet. Både dei tilsette og styret er no klare til å bretta opp armane. Dette skal vera ei hjørnesteinsbedrift i lokalsamfunnet, og det står korkje på vilje eller pengar for å utvikla hotellet vidare, sluttar Johannessen.
