Ny medlemsauke i Mållaget etter FpU-utspel

Dei siste vekene har Noregs Mållag og Norsk Målungdom fått over 100 nye medlemer. Dette i etterkant av Framstegspartiet Ungdom sin bruk av «F**k nynorsk»-banner i skulevalkampen.

– Eg trur mange tykkjer det er godt å kunna vise støtte til nynorsken på denne måten, når dei kjenner at språket er truga, seier Peder Lofnes Hauge, leiar i Noregs Mållag, i ei pressemelding.

Også for to år sidan auka medlemstalet til Noregs Mållag, då med 10 prosent, etter at FpU tok i bruk eit banner i skulevalkampen der bodskapen var «F**k nynorsk» med store bokstavar. Bodskapen vekte sterke reaksjonar, og i vekene som følgde fekk Noregs Mållag nærare 1500 nye medlemer på grunn av det.

Noregs Mållag understrekar at dei ikkje kan stogga FpU, men tykkjer dei har ei plikt ovanfor medlemer og nynorskelevar til å seia frå om at dei ikkje tykkjer slik språkbruk er greitt.

– «F**k nynorsk»-kampanjen er ikkje eit forsøk på å få ordskifte om sidemålsopplæringa, men handlar om nynorskmotstand. Det veit FpU veldig godt. Det er trist at dei prøver å vinna stemmer i skulevalkampen ved å trampa på språket til mange elevar, seier Peder Lofnes Hauge.