Ny leiargruppe i Kvinnherad brann og redning

Noko av det fyrste Ousdal måtte til med var å få på plass ein ny leiar for beredskapsavdelinga, etter at Jan Tore Brückner sa opp i stillinga på vårparten. I tillegg måtte ein erstattar for han sjølv som leiar for førebyggande avdeling på plass også.

Overtar permanent

No er det klart at Thomas Hallquist, som har vore konstituert i stillinga sidan Ousdal rykka opp, får jobben på permanent basis. Hallquist kjem frå stillinga som branninspektør, der han har vore sidan 2019.

– Eg er svært takksam for å ha blitt tilbydd stillinga som avdelingsleiar for førebyggande arbeid i Kvinnherad Brann og redning, og eg har takka ja til denne spanande moglegheita. Etter å ha jobba som branninspektør i fleire år, gler eg meg no til å ta fatt på nye utfordringar og bidra til å vidareutvikle det førebyggande arbeidet i kommunen. Det er eit viktig ansvar å sikre at Kvinnherad er ein trygg stad for innbyggjarane, og eg ser fram til å fortsetta å jobbe saman med mine dyktige kollegaer for å ta dette arbeidet eit steg vidare, seier Hallquist til facebooksida til Kvinnherad brann og redning.

Opprykk for brannmeisteren

Ny leiar for beredskapsavdelinga er også på plass. Are Blokhus skiftar beite frå avdelingsleiar ved KVV til brann- og redningsarbeid på heiltid. Han har også hatt vervet som brannmeister ved hovudbrannstasjonen på Husnes.

Til facebooksida til Kvinnherad brann og redning seier Blokhus:

– Eg er svært glad for å ha fått tillita som avdelingsleiar for beredskap i Kvinnherad brann og redning. Eg ser fram til å ta fatt på denne viktige oppgåva saman med dei dyktige tilsette i avdelinga, og eg gler meg til å bidra til å styrka tryggleiken i kommunen vår. Det å kunna jobba saman med 70 engasjerte og kompetente medarbeidarar er noko eg set stor pris på, og eg er motivert for å vidareutvikle beredskapen til beste for innbyggjarane i Kvinnherad, seier han.

Det går av meldinga på facebook fram at Blokhus vil tiltre stillinga etter oppseiingstida si ved Kvinnherad vidaregåande skule.