Ny kraftlinje: – Dette er ei sak som provoserer meg

I kommunestyret på torsdag tok Johansen opp kraftlinja og høyringa i spørsmålsrunden. Han sparte ikkje på krutet.

– Dette er ei sak som provoserer meg. Meldinga som er sendt frå Statnett til NVE tyder på ei arrogant haldning i forhold til både det vi som kommunestyre har spelt inn, men spesielt også dei innspela lokalsamfunna våre har spelt inn i kontakt med Statnett, innleia Ap-politikaren.

Spesielt traseen gjennom Rosendal ser han på som problematisk.

– Når det kjem til passering av Rosendalsområdet, vert linja foreslått å enten gå gjennom fjella våre som er nasjonalpark, i landskapsvernområde eller i KULA-området, som er eit kulturlandskap av nasjonal interesse. Eit kulturlandskap med garder, Baroniet og eit unikt landskap som har fått ein vernestatus. Men kva betyr så ein slik status med kulturlandskap av nasjonal interesse, dersom det berre betyr at bøndene og lokalbefolkninga må innretta seg, medan Staten i form av Statnett skal kunne dura på med massive konstruksjonar gjennom området?, undra Per Harald Havnen Löfgren Johansen.

No er kraftleidningen sendt på høyring – her er traseane

Forslaget ein katastrofe

Statnett har opna for om lag 1 kilometer med jordkabel gjennom Rosendal, som eitt av alternativa. Johansen var lite imponert over dette.

– Om ein skal vera heilt ærleg, er dette forslaget ein katastrofe og nærare ein provokasjon enn ei reell løysing. Den legg opp til to store muffestasjonar veldig sentralt i bygda, med ein kabel som er så kort som det er mogleg å få til. Eit veldig dårleg alternativ, sa han.

Johansen tykkjer elles det er veldig svakt av Statnett å ikkje greia ut ein kort sjøkabel skikkeleg.

– Her peikar Statnett på at djupna som ein eventuell kort sjøkabel må ned på er eit problem. Samstundes ser vi at når Statnett planlegg andre sjøkablar, er same djupne heilt overkomeleg. Mellom anna dersom vi skal senda krafta vår ut av kommunen og ut til resten av Sunnhordland, kjem kabelen til å koma ned på tilsvarande djupne, og djupare. Her er det i realiteten eit spørsmål om vilje og ikkje teknologi, slik Statnett legg opp til i sin argumentasjon, analyserte Per Harald Havnen Löfgren Johansen.

Han minna også om at i Bærum var det heilt greitt med ein lang jordkabel for å koma unna utfordringar i traséen.

«Kjemp for alt hva du har kjært»

Unngå feilen frå 60-talet

– No er det på tide at nasjonale verdiar i distriktet blir verdsett. Og det er på tide at storsamfunnet tek omsyn til dei lokalsamfunna som yter areal, som yter natur, som yter ressursar til gode for nettopp storsamfunnet. Vi må unngå at feilen frå 60-talet blir gjenteke no når ny linje skal byggast, oppmoda Johansen.

Han slo til slutt fast at det er viktig at Kvinnherad kommunen lagar ein god og grundig høyringsuttale. Men Johansen meiner fristen 16. januar 2025 er for kort, og spurde om ordføraren kan be om utsett frist, slik at kommunestyret kan handsama saka i fyrste møte over nyttår.

– Det er vesentleg at vi har tid til å finna fram til dei gode løysingane og dei gode svara. Og det er vesentleg at vi får tid til å behandla saka politisk på ein ordentleg måte, avslutta Johansen.

Svaret frå ordførar kom ikkje i møtet, men skal følgja med i protokollen.