Ny konstituert redaktør, men ingen «palassrevolusjon»

28. oktober tek Morten Nygård (55) over som konstituert redaktør i Grenda. Trass i at han eigentleg ikkje søkte på stillinga, ser rosendelingen ljost på framtida.

– Kva gjer ein redaktør, eigentleg?

– Ja, det lurar eg óg på!

Det kom litt brått på å skulla ramsa opp sine nye ansvarsområde. Men han sit med meir kunnskap om rolla enn han først kjem på, Morten Nygård, vår nye mann i sjefsstolen. Han har trass alt vore redaktørvikar mange gonger, når Håvard Sætrevik har hatt ferie eller permisjon.

– Eg skal planlegga oppsettet i kvar avis, og ha siste ord om kva saker me skal dekka. Eg blir ansvarleg for at det som står i avisa er rett, og har ansvaret for å staka ut kursen vidare, seier Nygård som eit meir seriøst svar på spørsmålet.

Stor lokalkunnskap

Styreleiar Knut Førland seier han er veldig glad for å ha funne ei god løysing for Grenda.

– Det er ingen tvil om at vår mest erfarne journalist er kvalifisert til å tre inn i rolla på permanent basis. Førebels har Morten og styret i fellesskap funne ut at ei konstituert rolle er den beste løysinga på noverande tidspunkt.

Førland nemner også at den store lokalkunnskapen og samfunnsforståinga til Nygård har vore utslagsgjevande for tilsetjinga.

Grenda-lesarar kjenner godt til Morten Nygård som den mest produktive journalisten i avisa.

– Du kan berre skriva den mest produktive i verda!, kjem det kontant frå gamleredaktør Sætrevik.

Ein omveg inn i journalist-yrket

Nygård søkte ikkje på stillinga som ny redaktør, men vart spurd av styret om å ta over. Journalisten har alt ein travel kvardag, men stiller seg likevel til disposisjon for avisa.

– Me har vore noko underbemanna dei siste åra, men no har me tilsett to nye journalistar, og eg syns det ser lovande ut for kva Grenda kan få til i framtida, seier han.

Det var ikkje journalist han skulle bli, eigentleg. Nygård har ein bakgrunn innanfor økonomi og rekneskap. Han har mellom anna jobba i KS Rekneskap (seinare Tveit Rekneskap), og han har vore tre år i Sunde Industri & Offshore, der han både førte rekneskap og køyrte løn.

– Når ein har køyrt løn i Sunde Industri & Offshore, så treng ein ikkje vera redd for noko meir her i livet, ler han, og ein kan nærmast sjå ei sky av timelister, smusstillegg, overtid, helgevakter og anna bask leggja seg over panna hans ein augneblink.

Interessa for, og evna til å skriva, førte han etter kvart inn i journalistyrket, i avisa han først berre førte rekneskapen for. Skrivinga har også resultert i ikkje mindre enn fire bøker – éi bok om oldefaren Johs. L. Ness, og tre bøker om kyrkjegardane i Kvinnherad.

Ein kolossal innsats

Mange kjenner Morten Nygård som ein engasjert kvinnhering, som både har vore med og arrangert Rosendal Musikkfestival i 18 år, og er leiar både i turgruppa i Rosendal Turlag, og for Kjeldestøl Venelag. Han er også glad i å reisa, for å oppleva natur, konsertar og fotballkampar. Han var nettopp i Roma for å høyra ikkje berre éin, men to konsertar med David Gilmour, tidlegare gitarist i Pink Floyd.

Om «gamlesjefen» Håvard Sætrevik har Nygård berre gode ord å seia. Sjølv om sjargongen på kontoret sjeldan tillét spesielt svulmande kjærleikserklæringar, klarar me å lokka han til å dela kva han faktisk synest om sin gode kollega.

– Håvard har lagt ned ein kolossal innsats for Grenda! Han er ein inkluderande leiar, og gjev folk gjennomslag for sine idéar. Håvard har ikkje lete klokka bestemma når arbeidsdagen er slutt, han har gjort den jobben som krevst for å laga den avisa lesarane fortener.

Ingen store endringar

Knut Førland supplerer:

– Me i styret vil takka Håvard for ein mangeårig og svært god innsats. I hans tid har det skjedd mange utfordrande endringar i mediebransjen. At Grenda har klart å svara på det med aukande opplagstal, viser at ein har lukkast med dei vegvala ein har teke, seier styreleiaren.

Det vert truleg ikkje store endringar for lesarane når Morten Nygård tek over redaktørjobben.

– Eg syns me har eit godt nivå, og vil heller vidareføra det, med små betringar undervegs, etter behov. Det blir ikkje noko palassrevolusjon, slår han fast.