Ny klimakonferanse på trappene
9. – 11. august er det igjen klart for Rosendalsveko, som skal setja Vestlandet på kartet som ein føregangsregion for eit berekraftig skifte.
Publisert
Konferansen vil finna stad på Folgefonnsenteret i Rosendal, og blir arrangert av Folgefonnsenteret, Bjerknessenteret/UiB og Havforskingsinstituttet. Føremålet med satsinga er å samle nærings- og samfunnsliv, institusjonar og politikarar til idémyldring rundt klima, energi, næringsutvikling og berekraft.
Gjennom desse dagane vil utfordringane og moglegheitene ein står føre bli diskutert. Først ut på programmet er ei evaluering av året som har gått, kor det skal vurderast kor langt ein er komen i berekraftig omstilling på Vestlandet sidan Rosendalsveko 2020. Programmet består elles av bolkar under emne som kraft, klima, ressursforvaltning i havbruket, bioøkonomi, reiseliv og utdanning. Desse vert sett i lys av berekraft.
Annonse
Regionalt og globalt perspektiv
Avslutningsvis skal Vestlandet bli vurdert i eit globalt perspektiv, ein post som i år står oppført på programmet med den optimistisk ladde visjonen «Lykkes Vestlandet – lykkes Norge». Programposten skal gjennomførast som ein panelsamtale, moderert av Eystein Jansen (Academia Europea og UiB), professor i geovitskap og paleoklimatologi og tidlegare direktør for Bjerknessenteret.
Jansen er særskilt interessert i aspekt knytt til klimaendringar og samspelet mellom menneskeskapte og naturlege endringar, og har gjennom sitt arbeid og forsking fått ein brei bakgrunn i klimaspørsmål og -politikk.
I tillegg til Jansen er det ei lang liste over bidragsytarar frå det lokale næringslivet, politikarar og frå ulike institusjonar som skal vera med i dei viktige og utfordrande diskusjonane ved Folgefonnsenteret desse dagane.
Annonse
– Kva skal vi bruke vasskrafta til i framtida? Kan vi bli ein testregion for hydrogenproduksjon, lagring og bruk? Kan vi eksportere kunnskapen frå regionen?
Dette er nokre av spørsmåla arrangørane stiller seg, og vonleg kjem nærare å svara på, i løpet av Rosendalsveko. Hendinga vart arrangert for første gong i fjor, og er ei tverrfagleg satsing som har klima, energi og berekraft som gjennomgåande tema.
Tidlegare i vår vart det kjend at Hans Inge Myrvold hadde invitert Erna Solberg til å opna Rosendalsveko 2021. Det er no stadfesta at statsministeren ikkje kjem, men at direktørane ved Havforskingsinstituttet og Bjerknessenteret sjølve vil stå for opninga, saman med Myrvold.
– Me har plass til 80 totalt, så det blir lite og intimt og billettane forsvinn kjapt, melder Una Kolle, og legg til at programmet på nett vil bli oppdatert etterkvart.
