Ny inntektsmodell for kommunane gir Kvinnherad millionauke
Tysdag la regjeringa fram sitt nye inntektssystem for kommune-Noreg. Kvinnherad får 12,7 millionar meir i 2025.
Publisert
Sist oppdatert
– Det har vore ein prosess over tid, og grunnlaget har vore på høyring. Hovudessensen er auka omfordeling, frå dei mest skattesterke kommunane som no må bidra meir til fellesskapet, og over til dei skattesvake, fortel Hans Inge Myrvold (Sp) om endringa som slår positivt ut for blant andre Kvinnherad.
Sunnhordland vinn
Annonse
Sunnhordland som region er av dei store vinnarane etter endringa, og Kvinnherad er ein av dei.
– Det er to summar å forhalda seg til for kommunane. Det blir først ei overgangsordning, der Kvinnherad får ein auke på 12,7 millionar kroner i auka rammeoverføring i 2025. Etter dette blir den vedvarande endringa 9,2 millionar kroner meir enn i dag, forklarer Myrvold.
Det er altså skattepengane som no får ein annan fordelingsstruktur. Skattesterke kommunar som Austevoll (som har ein skatteinngang på 151% av landssnittet) og Tysnes (118% av landssnittet), må gje noko frå seg, høvesvis 29 og 3,2 millionar kroner. Dei største bidragsytarane er Bærum (0,5 mrd kroner), Oslo (0,5 mrd) og Asker (0,25 mrd).
– Her sit det ekstremt mange bedriftseigarar, til liks med at hovudkontora også er lokalisert der. Ser ein Vestlandet samla, så vil meir av denne skatteinngangen gå meir tilbake til verdiskaparane, vurderer Myrvold.
Annonse
Naturressursar
Fitjar er den sunnhordlandskommunen som får mest i auke, med 10,6 millionar kroner på deira vel 3000 innbyggjarar, medan Stord (37 mill.) og Bømlo (27 mill.) også får meir.
– Det har vore viktig for kommunane at det som går på skattelegging av naturressursar blir haldne utanfor. Meirinntekter som er resultata av nedbygging av natur, er viktig at ein held på. Det var eit forslag tidleg i prosessen, men regjeringa har skrota det forslaget, påpeikar stortingspolitikaren.
Han meiner Kvinnherad også er plassert i rett sentralitetsklasse, og får noko betalt for avstanden til resten av landset, som kostar oss så mykje elles.
– Har vore viktig å kompensera for. No får ein eit armslag til å driva utvikling og ikkje avvikling, sluttar Myrvold.
