Ny brannsjef utnemnd

Stillinga heiter formelt einingsleiar for brann og redning, og Øyvind Ousdal har vore konstituert i stillinga sidan Atle Josdal tredde ut av stillinga tidlegare i sommar.

– Me hadde åtte søkjarar på denne jobben. Det er gjennomført tilsetjingsprosess, og me hamna på – og har tilsett – den me meiner er best kvalifisert. Øyvind har vore varabrannsjef og konstituert brannsjef dei siste månadene, seier sektorleiar for teknikk og miljø Sigbjørn Øye.

I tillegg til brannsjefstillinga, søkte Kvinnherad kommune også etter avdelingsleiar for beredskap. Begge dei stillingane hadde same søknadsfrist. Når ein no har fått eit internt opprykk av avdelingsleiar for førebygging, blir endå ei stilling i eininga lyst etter.

– Me har lyst ut Øyvind sin jobb no. Avdelingsleiar førebyggjande har frist i slutten av august, og me har sett på vent tilsetjinga av leiar for beredskap i nokre veker. Det gjer me då ynskjer å tilsetja til begge stillingane i eit parallelt løp, seier Øye.

Han legg ikkje skjul på at han håper at mange av dei som har søkt på stillinga som leiar for Kvinnherad brann og redning og/eller leiar for beredskap i same eining også søkjer på stillinga som avdelingsleiar for førebygging.

– Følgjer kursen til Atle

Øyvind Ousdal er glad over å få tillita til å leia Kvinnherad brann og redning vidare etter Atle Josdal.

– Atle har sett sine spor etter åra her, med kursing, nye stasjonsbygg og jobben med å byggja opp brann og redning til det er no. Det er ei fin tid å overta, for han har staka ut ein kurs for oss, som me kjem til å følgja framover, seier Ousdal, som har vore konstituert i stillinga sidan 24. mai.

Han fekk tilbod om jobben førre måndag, og takk raskt ja. Han blir naturleg nok også involvert i den neste tilsetjingsrunden, når to nye avdelingsleiarar skal på plass.

– Det har praktisk verdi å gjera det slik, og det er spennande kven ein får med seg i leiargruppa. Leiargruppa går i vaktrotasjonen. Eg veit godt kva eg går til. Det blir ikkje så mykje nytt, men større ansvar og ein noko meir administrativ jobb, inkludert personal og økonomi, seier Ousdal.

Han rår blant anna rår over 75 deltidstilsette brannkonstablar.

– Sjølv om stillingsstorleiken er liten for dei, skal dei følgjast opp, kvar og ein, påpeikar han.

Eit anna område som skal følgjast opp framover er brannstasjonsstrukturen.

– Det er kommunestyret som kjem til å staka ut kva som skjer der, kommenterer han der, med referanse med rapporten som Einang Safety Consult utarbeidde i samband med eit lovpålagt planarbeid for Kvinnherad brann og redning i vår.