Ny botnrekord for laksefisket – men overraskande gode tal i Uskedalselva

Miljødirektoratet opplyser i ei pressemelding at førebelse tal frå laksefisket i år tyder på at det kom veldig få laks på over tre kilo til elvane frå Vestland til Trondheimsfjorden.

– I undersøkte elvar som var opne for laksefiske heile sommaren, vart det fanga berre 72 prosent av den mengda laks ein tok i fjor, som også var eit veldig svakt år, seier direktør for Miljødirektoratet, Ellen Hambro, i pressemeldinga.

Dei nye, førebelse tala kjem fram i eit notat som Norsk institutt for naturforsking (NINA) har laga på oppdrag frå Miljødirektoratet. NINA har samanfatta fangstar frå fire kilenotstasjonar, og rapporterte fangsttal og fisketeljingar frå vel 100 lakseelvar i heile landet. 53 av elvane var opne for laksefiske gjennom heile sesongen.

I juni fann som kjent Miljødirektoratet det nødvendig å stengja fisket i 33 store lakseelvar. 17 av desse var stengde gjennom heile sommaren, deriblant Uskedalselva, medan 16 vart gjenopna for eit svært avgrensa fiske etter snautt tre veker.

Stengjer laksefisket i Uskedalselva – og 32 andre elvar

«Hovudgrunnen til stenginga var at det kom svært lite laks på meir enn tre kilo, som i desse elvane er ekstra viktige for å sikra at det blir nok lakseungar til at det blir forsvarleg å fiska også i framtida», opplyser Miljødirektoratet.

– Ved å stengje laksefisket i 33 elvar i juni bidrog vi til at fleire laks fekk formeira seg, noko som er svært viktig når det kom så få laks til elvane som i år, seier miljødirektør Ellen Hambro.

Restriktiv i starten

I to av elvane som var stengte resten av sommaren, ser det ut til at det etter kvart kom litt meir laks enn frykta. Dette gjeld Glomma og Uskedalselva. På tidspunktet Miljødirektoratet vurderte kva for av dei stengde elvane som kunne gjenopnast, trudde ein det ville koma for lite laks også til desse to elvane.

– Når laksen er så pressa som han er no, kan det også i framtida bli nødvendig å stansa fisket når det ser ut til å koma for lite laks til elvane. Samtidig legg vi frå neste år om til ein føre var-strategi i dei mest utsette elvane, der vi er restriktive i starten av sesongen, for så å heller opna meir seinare dersom det viser seg at det kjem nok laks, seier Ellen Hambro.

Miljødirektoratet ber no om å få planar frå elveeigarlag i ekstra utsette elvar, for korleis laksefisket skal haldast på eit forsvarleg nivå. Dette gjeld spesielt elvar der det har vore lite laks over nokre år, eller svært lite laks berre i år.

Opnar laksefisket i halvparten av elvene

Uskedalen og Ænes

NINA har også føreteke grundige teljingar i elvane. Uskedalselva vart tald 7. oktober ved såkalla drivteljing. Undersøkinga viste 272 fiskar i alt, fordelt på 102 små, 148 mellomstore og 22 store. Samanlikna med tidlegare teljingar får tala vurderinga «Blant det høgaste i tidsserien». Forskarane sette også opp eit omtrentleg tal for kor mange kilo hunnfisk som er i elva, og kom fram til 608 kilo. Det er faktisk godt over gytebestandsmålet på 386 kilo.

«Gytebestandsmålet vart nådd med god margin. Det ville derfor ha vore rom for fiske i vassdraget i 2024», vert det oppsummert.

I Æneselva var resultatet mykje dårlegare. Der vart teljinga gjennomført 23. september. Forskarane observerte berre 24 fiskar, fordelt på 13 små og 11 mellomstore. Mengda hunnfisk vert estimert til 41 kilo totalt, medan gytebestandsmålet er mykje høgare, nærare bestemt 177 kilo. «Omtrent som tidlegare år», er den triste konklusjonen.