Ny avtale for pasienttransport

1. desember 2017 gjekk Helse Fonna inn i ein tilleggsavtale for køyring av rekvisisjonspasientar i Kvinnherad kommune, og meiner med det at alle innbyggjarane skal ha eit fullverdig taxitilbod når dei treng tilrettelagd transport til og frå behandling.

No er det avgjort at frå og med den datoen skal alle som treng reiser med rekvisisjon skal ha like retningsliner. Det vil også seia at pasientane ikkje lenger treng å leggja ut for dei korte turane sjølve, bortsett frå eigedelen.

– Det er bra at folk slepp å leggja ut for turane. Tidlegare var det nok mange som valde vekk behandlingar fordi det vart for dyrt. Eg trur kanskje ikkje alle er klar over at avtalen er i boks, så no håpar eg folk får med seg at tilbodet har blitt betre, seier Arne Bjørnevik i Kvinnherad taxi.

BSG-transporting har fått tildelt kontrakten som pri1 (førsteprioritet) i Rosendal/Sunndal, Husnes/Valen og Matre/Åkra og på Varaldsøy, medan Kvinnherad taxi har pri1 på Halsnøy, og er pri2 i resten av kommunen. Pasientreiser Helse Fonna tildeler oppdraga til den transportøren som skal ha oppdraget, og rekvirentane (legen) treng berre å leggja inn rekvisisjonen i systemet sitt.

– No skal alle som legen bestemmer at skal få bil, få bil. Når legen bestiller ein tur, får vi det rett inn på taksametera våre. Slik eg forstår det legg dei alle turar frå Husnes og innover til taxiselskapet BSG, og så melder BSG frå til pasientreiser dersom det er turar dei ikkje klarar å ta, seier Arne Bjørnevik i Kvinnherad taxi.