Ny AiR-utstilling ved Halsnøy Kloster

I mai 2022 var tre kunstnarar, Jessica Hines, Andy Mattern og Torbjørn Morvik, saman på klosteret der dei utvikla kvar sine prosjekt. Artistane hadde kvar sine blikk på staden, folka og opplevinga dei fekk ved å vera der i tre veker. Dei vart ein veldig samansveisa gjeng som var svært produktive og som utrykkjer seg heilt forskjellig, skriv avdelingsleiar ved Halsnøy Kloster og Sunnhordland Museum Helén Petersen i ei pressemelding.

Fantasiverd og speglar

Jessica Hines frå USA har laga to seriar der ho blant anna har valt å bruka naturlege materialar i bileta sine, noko som gjev svært vakre og spanande bilete av ei fantasiverd. Andy Mattern, også frå USA, jobbar hovudsakleg med fotografi og har laga installasjonar som gjerne utfordrar konvensjonar og forventningar, står det vidare.

Torbjørn Morvik, som opphaveleg er frå Bergen, er ein anerkjend dokumentarfilmskapar som også har ein omfattande CV som biletkunstnar. I likskap med Mattern jobbar også Morvik med fotografi, då gjerne i svart-kvit.

– Eg møtte med eit heilt ope sinn, utan andre planar enn å sjå Halsnøy via spegel og ved å komprimera tid og stad ved bruk av multieksponeringar i kamera. Eg let tematikken i bileta finna meg, ikkje omvendt, seier Morvik i pressemeldinga.

To av kunstnarane, Torbjørn Morvik og Andy Mattern, kjem til å vera til stades under opninga.