Norsk Lektorlag meiner skriftleg og munnleg eksamen bør gjennomførast

11. februar vart det kjend at regjeringa støtta Utdanningsdirektoratet sitt råd om å avlyse vårens eksamenar for elevar i 10. klasse og på vidaregåande skular. Forslaget vart dernest sendt ut på høyring, med svarfrist 20. februar. Fristen var kort slik at ein raskt kunne få avklart utfall i saka.

I høyringssvara kjem det fram at ikkje alle instansar er samde i forslaget om å avlysa. Mellom anna meiner Norsk Lektorlag at både skriftlege og munnlege eksamenar bør kunne gjennomførast.

Regjeringa støttar å avlyse eksamen i vår: - Endeleg avgjerd vil bli fatta om kort tid

Finn ikkje fagleg grunnlag for å avlyse

«Norsk Lektorlag ser ikkje behovet for å opna for avvik frå ordinær fag- og timefordeling, eller frå kompetansemål i fag, via forskrift. Våre medlemmer merka lite til denne unntaksavgjerdsla våren 2020 og våren 2021. Ei slik forskriftsendring blir ikkje opplevd som eit treffsikkert tiltak.» heiter det mellom anna i høyringssvaret deira.

Vidare peikar dei på at fylkesleiarane i Norsk Lektorlag er samde om at sentralt gjeve skriftleg eksamen kan gjennomførast denne våre, og dei meinar også at det ikkje finst fagleg grunnlag for å avlyse lokalt gjevne munnlege og munnlegpraktiske eksamenar denne våren. Dette gjeld både for vidaregåande og for ungdomsskulen.

«Sjølv om det er krevjande, bør det ikkje vera umogleg å finne løysingar som gjer at flest mogleg elevar får ein ekstern vurdering av sin kompetanse gjennom å gjennomføre eksamen.» konkluderer dei.

Ingen merknad frå Vestland Fylkeskommune

Vestland Fylkeskommune sitt høyringssvar er utan merknadar, og føyer seg såleis inn i rekkja av aktørar som støttar regjeringa sitt forslag.

Eit utdrag av forslaget som har vore ute på høyring lyder følgjande:

For at elevane skal kunne oppnå vitnemål utan eksamen, blir det føreslege at dei vil få dispensasjon frå vitnemålskrava ved avlyst eksamen på grunn av covid-19, så lenge dei har bestått standpunktkarakter i faget. For dei eksamenane som framleis skal bli gjennomført, blir det føreslege å nytta dei same unntaksreglane om dokumentasjon av covid-19-relatert fråvere på eksamen som gjaldt ved eksamen våren og hausten 2021. Departementet ber om høyringsinstansane sitt syn på om det skal opnast for mellombelse tilpassingar av fag- og timefordelinga og kompetansemål, slik det har vore mogleg dei to førre skuleåra.

Det er enno ikkje klart kva tid avgjerdsla om vårens eksamenar endeleg blir fatta.