Nominert til årets beste programleiar

– Det er veldig stas!, seier Gerd på telefon frå Bergen.

Prix Norge er Noregs offisielle pris for ulike kategoriar innanfor radio, podkast og lyd. Prisane vert delt ut i samband med fagkonferansen Lyddager. Det er som programleiar i BT-podkasten «Nokon må gå» at Gerd er nominert.

– Det er ein podkast om politikk og kvardag, ein pratepodkast som tek for seg aktuelle saker me bryr oss om og synest er interessante, fortel BT-journalisten.

Viktigaste skulen

Det var ikkje journalistikk ho studerte, men Gerd Margrete Tjeldflåt har likevel ei flott karriere som journalist. Medan ho studerte historie og økonomi, skreiv ho i Grenda og i studentavisa Studvest i Bergen. Åkrabuen var vikar i BT i eitt år, før ho fekk fast stilling i 2013. I 2020 vart ho politisk kommentator.

– Det å ha jobba i lokalavisa og studentavisa var den viktigaste skulen for meg som ikkje har studert journalistikk-faget, seier ho.

Podkasten «Nokon må gå» har blitt laga sidan 2019. Der er Gerd programleiar, og har med seg Morten Myksvoll og Marie Nisund Bringslid som også er politiske kommentatorar i BT.

– Ja, me har jo faktisk 5års-jubileum i år, det har eg ikkje tenkt på før. Me bør kanskje laga ein julileumsepisode, funderar journalisten.

Ein kan tru at det er lett å berre setja seg i eit studio og prata «laust og fast» om politikk og kvardag, men det er mykje arbeid som ligg bak, kan Tjeldflåt fortelja.

– Me jobbar mykje med å laga kvar episode på ein måte som er både informativ, interessant, og samstundes underhaldande. Me har jo mange Bergenssaker, til dømes, og då må me finna ut korleis me skal inkludera lyttarar som ikkje er frå byen og kjenner til sakene.

Blikk utanfrå

Podkasten har sett seg som mål at det skal vera kjekt å høyra på, og vel å omtala saker som kanskje skiljer seg litt frå Aftenpodden og andre riksmedier sine podkastar.

– Me snakkar om dei viktigaste sakene me óg, men me har også saker som er litt spesielle. Sidan me ikkje jobbar frå Oslo, som tilsvarande podkastar gjer, så har me kanskje eit anna perspektiv på ting – eit blikk utanfrå, forklarar Gerd.

Når me spør kva ho ser for seg som årsaka bak nominasjonen som årets beste programleiar, må ho tenkja seg litt om.

– Eg håpar det er fordi eg klarar å formidla ting på ein forståeleg og engasjerande måte. Det er min jobb å syta for framdrifta i sendinga og på ein måte halda dei andre i øyrene, ler ho.

18. oktober får me vita om åkrabuen vinn prisen eller ikkje. Men Gerd har andre planar den dagen:

– I år har me eigne USA-podkastar, og skal dekka valet der borte. Så eg reiser snart til Philadelphia, i vippestaten Pennsylvania. Eg gler meg til å oppleva valkampen i USA!