Nokre stader har fått ny asfalt – andre må venta til neste år

Mellom anna Åkra og Løfallstrand har blitt velsigna med ny asfalt i det siste. Mauranger, Uskedalen og Herøysundet må derimot venta til neste år.

Kathrine Løno Lahlum, leiar for utbygging sør hjå Vestland fylkeskommune, møtte i kommunestyret på torsdag for å fortelja om status for Kvinnheradpakken og andre vegtiltak. Eit tema var dekkelegging, noko som vil seia asfaltering. Lahlum opplyste at åtte punkt mellom Dimmelsvik og Åkra har blitt asfalterte no i haust.

– Så var det på planen å ta ei strekning mellom Porsvik og Herøysundet. Den er forskyvd til 2023; litt fordi vi har eit prosjekt gåande der, og fordi vi legg vi inn litt meir midlar på strekninga til neste år, slik at ein får teke det meir samanhengande når prosjektet vårt er ferdig, sa ho.

Mykje forbanning

Det same gjeld for strekninga Folgefonntunnelen til Årsnes.

– Der var det planar om dekkeleggingstiltak, men der gjer vi så mange punktvise utbetringar no. Vi føler at om vi skal få noko igjen for pengane, så ynskjer vi å leggja nytt dekke på mesteparten av strekninga når vi er ferdige. Dette vil nok koma på slutten av neste år, viss ikkje noko spesielt skjer, fortalde Kathrine Løno Lahlum.

Fylket har fått inn innspel om fleire strekningar, så dei ser på eventuelle andre tiltak i tillegg.

– Slik vegane har utvikla seg, byrjar det å bli mange spørsmål og mykje forbanning ute blant folk, sukka Øyvind Hardeland (Ap).

– Vegvedlikehaldet er altfor dårleg, og det går galne vegen. Sjølv om det blir asfaltert litt i år og til neste år, så er vi langt bakpå, supplerte Ove Lemicka (Frp).

Marit Årthun (KrF) tok derimot ei positiv vinkling.

– Innbyggjarane i Åkra er veldig glade for den nye asfalten som er kome der, sa ho.

Uskedalen

Dei stygge partia kring Løfallstrand, der det var store sår i asfalten som kunne vera farlege for motorsyklistar, vart asfalterte i midten av november. Dette var ein reklamasjonsjobb.

Nettstaden Uskedalen.no skriv at strekninga frå Uskedalen sentrum til Herøysundet er blitt råka av utsetjing. Der er det mange som ventar på utbetring av mellom anna den store fartshumpen ved Kvinnherad Vekstbedrift, noko Øyvind Hardeland har etterlyst i kommunestyret ved fleire høve. Nettstaden skriv elles at Eikevegen vart asfaltert for nokre dagar sidan.