Nøgde – men spente på om strategiplanen vert endra

Då Kommunestyret kom til rådhuset torsdag føremiddag, vart dei møtt av seks vindkraftmotstandarar. Blant dei var sjølvsagt Annemor Ekeland.

– Vi har fått positive tilbakemeldingar frå dei som har gått inn, smilte ho då Grenda kom traskande.

Den mest kontroversielle saka på programmet, var Kvinnherad Energi sin strategiplan, der også vindkraft har sine eigne avsnitt.

– Kvinnherad står samla mot vindkraft. Saka i dag kan verka som ei lita sak, men det er ei stor sak og ei sak som kan verta ein døropnar mot det vi ikkje vil ha, vurderte Ekeland.

– Kvifor står de her i dag?

– Vi vil ikkje ha vindkraft i Kvinnherad. Vi SKAL ikkje ha vindkraft i Kvinnherad. Så enkelt er det, slo Annemor Ekeland fast.

Håplaust å følgja med

Fleire av demonstrantane følgde også debatten frå publikumsplass i kommunestyresalen. I møtet understreka alle partia at dei framleis er sterkt imot vindkraft i Kvinnherad. Annemor Ekeland var veldig nøgd då ho drog heim.

– Det viktigaste for oss var at Kommunestyret gjentok at Kvinnherad er imot vindkraft. Dei sendte viktige signal, og eg er spent på om styret i Kvinnherad Energi no vil revidera strategiplanen, sa ho.

Samstundes la ikkje Ekeland skjul på at det hadde vore frustrerande å følgja møtet, då publikum i salen ikkje hadde noko moglegheit til å vita kva forslag som vart røysta over, korleis teksten nøyaktig var formulert og kven som røysta kva. Alt føregjekk nemleg digitalt.

– Som publikummar var dette håplaust. Forslaga burde kome opp på skjermen, sa ho.

Til Grenda kunne kommuneadministrasjonen opplysa at dei har bestilt ein datamodul som skal gjera at folk i salen kan følgja med på storskjerm, og truleg er dette på plass til fyrste møte neste år.