– Nøgde med å ha kome i mål

Då Grenda snakka med forhandlingsleiar for Arbeidarpartiet Synnøve Solbakken og forhandlingsleiar for Høgre Leif Sverre Enes på telefon onsdag kveld var dei framleis i rådhuset, om enn på veg til å forlata forhandlingslokala.

– Har det gått fort?

– Ja, me er nøgde med at me har kome i mål i dag, seier Solbakken, og får støtte av Enes.

– Det har gått i unormalt høgt tempo til å vera Kvinnherad, meiner han.

Braut med Sp

Den nye koalisjonen består av dei to største partia i det komande kommunestyret, samt KrF og Venstre. Fram til onsdag ettermiddag var Sp med og forhandla med H og Ap om fleirtalsposisjonane.

– Me har hatt gode forhandlingar med Sp, fram til i ettermiddag. Sp spelte då inn nokre vilkår som me ikkje kunne vera med på, og då skar det seg. Då var me ferdig snakka, og braut forhandlingane, seier Solbakken.

– Venstre tilbaud sine tenester, og lurte på om dei kunne få vera med på laget. Krava deira var moderate, og dei kjenner si rolle i forhold til storleiken i kommunestyret, legg Enes til.

– Kva er dei viktige punkta å samla seg om framover?

– Ordførar og varaordførar er på plass. Me skal setja oss ned og laga plattform, og så må veljarane få sjå igjen for det dei har stemt på. Det er semje om plattform, men plattforma er ikkje veldig detaljert. Me har sonderingar kring viktige emne, og alt går på å føra kommunen fram i rett retning. Me har vedteke ein samfunnsplan som er styrande for det politikarane vil, uavhengig av kva kommunestyre som styrer, meiner Enes.

Møtest att på måndag

Partia er blitt einige om å møtast igjen på måndag.

– Me har vore i saman mykje, og er veldig samstemte om korleis me skal jobba framover. Me har god tid til 19. oktober, og med dei haldningane og kommunikasjonen me har hatt i dag, så er me trygge på at me skal ha ei god plattform. Det ligg ikkje nokon tikkande bomber nokon plass der, vurderer Solbakken.

Forhandlingsleiarane seier dei har drøfta igjennom det meste. Onsdag har det vore fem frå kvart parti med i forhandlingane.

– Målet er at det skal gå bra. Me har signert ein avtale på at me skal bli einige om dette, i tillegg til posisjonane som er fordelte i dag, seier dei.

Dei varslar at det blir gruppemøte i dei respektive partia. Ap skal ha medlemsmøte på fredag.

– Me tar eit møte, for det er alltid nokon som lurer på noko, avklarar Solbakken avsluttingsvis.