Nøgd med utviklinga i andre kvartal
Tysdag presenterte Hydro Husnes eit overskot før renter, skatt og avskrivingar på 297 millionar kroner for andre kvartal 2024.
Publisert
Sist oppdatert
Det er ikkje på same nivå som i fjor, men betre prisar på aluminium og produkta som blir produsert på Husnes gir eit betre andre kvartal for Hydro Husnes enn på starten av året. – Verdssituasjonen gjer at viktige marknader i bil- og byggjeindustrien framleis er nede i ein bølgedal. Men forbetringsarbeidet i organisasjonen gjer at me har god kontroll på dei parameterane me kan styra. Her har organisasjonen gjort ein god jobb, seier fabrikksjef Jon Ola Ystgaard i ei pressemelding i samband med kvartalsresultatet til bedrifta.
Oppstart i A-hallen
Annonse
I vår fatta Hydro avgjerda om å investere nye 225 millionar kroner i full teknologioppgradering av alle elektrolysecellene på Husnes til same nivå som i B-hallen. Arbeidet er i følgje pressemeldinga godt i gang, og dei første oppgraderte omnane i A-linja er no starta opp.
– Me trur den europeiske marknaden for lågkarbonaluminium vil vera god på lengre sikt, og me er i gang med fleire prosjekt for å modernisera anlegget. Det er stabile og gode rammevilkår, saman med tilgang på nok fornybar kraft som vil gjera det mogleg å produsera aluminium for det grøne skiftet i mange tiår framover, meiner Ystgaard.
Ferievikarar held hjula i gang
Medan store deler av organisasjonen tek ei velfortent sommarpause, er det både ferske og erfarne som utgjer om lag 145 ferievikarar som bidreg til full drift på aluminiumsverket i sommar.
Annonse
– Det er ein veldig fin tradisjon for Hydro at ungdom kan kome heim til Husnes i ferien og gjere det som ofte er ein relevant jobb for studia og få erfaring med kva som rører seg på golvet inne på aluminiumsverket. Vår viktigaste oppgåve no er å syte for at alle får god opplæring og oppfølging så alt skal gå trygt føre seg gjennom sommarmånadane, seier Ystgaard.
Han gler seg også over at Hydro Husnes har ikkje hatt personskadar med fråvær så langt i 2024.
– Sikkerheit er alltid øvste prioritet, og erfaringa vår er at godt forbetringsarbeid fører til at arbeidsplassen blir tryggare. Alle skal koma trygt heim frå jobb hjå Hydro, seier Ystgaard.
