- No ventar me berre på action
For om lag eit år sidan skreiv Grenda om Rødtunet i Uskedalen. Då var dugnadsgruppa i Uskedalen i gong med livreddande fyrstehjelp på bygga som stod, og framleis står, til nedfalls. No er det omsider litt framgang i saka.
I eit brev til kommunen etterlyste medlem av dugnadsgruppa Audun Eik svar på klarsignal til felling av tre, samt klårleik i kva som skjer med midlane som var blitt lova til prosjektet.
Koordinering
Annonse
Vidare i brevet skreiv dei at dugnadsgruppa har teke på seg arbeidet med restaurering av sloket til kverna på Rød, og at dei treng grove materiale til dette.
– Saka gjeld felling av nokre lerketre ved Gamleskulen på Haugland. Me har høyrt at Øyvind Hatteberg, som er tenkt til å gjera dette arbeidet, ventar på klarsignal frå dykk. Me har heller ikkje høyrt noko om midlane som var tildelt restaureringa av Rødtunhuset. Det ville vore synd om midlar som var tenkt til oppgradering av Rødtunet vert omdisponerte, og at tunet så vert ståande utan midlar nok ein gong, sa Eik i brevet.
Folkehelsekoordinator og fagkoordinator kultur og idrett Kristian Helgesen er kontaktperson i saka, og han fortel at det er fleire ting som skal koordinerast og avklarast før ein kan gå vidare.
– Sjølve takbyttet og restaureringa av huset er eit eige prosjekt. Før me kan setja i gang med det, må me fella nokre tre, slik at dei som skal arbeide på huset kan jobba trygt. Når det gjeld trea i Uskedalen, så er dei av ein slik karakter at det må profesjonelle til for å kappa dei ned, forklarte Helgesen.
Annonse
– Trefellingane er også ein del av eit anna prosjekt der det skal fellast tre fleire stader i kommunen. Det me jobbar med no er å få på plass kor finansieringa skal koma frå, fortsette han.
Helgesen stiller seg derimot positiv til at dugnadsgruppa tek initiativ til å ta på seg restaureringa av sloket til kverna på Rødunet, samtidig som han forsikrar at pengane er fastlåste og ikkje står i fare for å verta omdisponerte.
– Eg meiner å hugsa at sist sloket vart restaurert var på 90-talet. Dugnadsgruppa i Uskedalen er ein svært kompetent gjeng, og me er veldig glade for at dei tilbyr seg å gjera det. Midlane som vart løyvde er ein del av investeringsbudsjettet og er blitt sett av. Dei er ikkje forsvunne, understrekar Helgesen.
Positivt svar
Leiar for avdeling for prosjektering og eigedom Erlend Bøyum, som også jobbar med denne saka, kunne fortelje at dei venta på hjelp frå Sunnhordland Museum før dei kunne gå vidare.
– Hellene må av, taket under må tettast, så må hellene opp att. Dette er jo gamle bygg, og me prøver å finna ut korleis dette kan gjerast. Det er framleis litt usikkert kven som kan utføra arbeidet og kor mykje arbeid det faktisk er. Ofte dukkar det jo opp fleire ting undervegs også, men no me har fått litt hjelp, prosjekteringsarbeidet er i gang og me håpar på å få det lyst ut før jul, forklarte Bøyum.
Annonse
– Dette arbeidet krev ganske spesifikk og inngåande kunnskap, noko det er svært få som har. Så me har gått og venta på personen som kan hjelpa oss med det, men no er me altså i gang med å laga eit grunnlag for å lysa ut konkurranse på å fiksa taket. Det går litt seint, men det går likevel på fram, forsikra han.
I ein telefon til den utvalde talspersonen til dugnadsgruppa Audun Eik for å høyra om kva dei tenkjer om saksgangen, innrømmer han at dei er noko utålmodige men at dei likevel er nøgde med svaret dei fekk.
– Me fekk eit positivt svar, og dei takka og bukka for at me var viljuge til å hjelpa til med blant anna sloket. I tillegg er me letta over at pengane er låste og ikkje går til andre ting. No ventar me berre på action, sa Eik.
