No startar bygginga av Blåfalli-Gismarvik: – Ein stor milepåle

Blåfalli-Gismarvik er den nye kraftleidningen som skal byggjast mellom Kvinnherad og Tysvær. Prosjektet er Statnett sitt nye samband til Haugalandet. I ei pressemelding fredag føremiddag opplyser kraftgiganten at Romarheim Entreprenør no er i gang med å etablera seg i Kvinnherad, og snart startar grunnarbeida for å utvida Blåfalli koplingsstasjon i Indre Matre.

«Sambandet inngår i trinn to i Statnett sin områdeplan for Bergensområdet og Haugalandet. Når sambandet står ferdig, legg den til rette for auka og sikrare straumforsyning til Haugalandet, elektrifisering for å nå klimamål, og bidreg til å etablera nye arbeidsplassar i regionen», heiter det i meldinga.

– Vi har planlagt bygginga lenge, og det er ein stor milepåle for oss at anleggsarbeida no har starta, seier Kari Eika, som er senior prosjektleiar i Statnett.

Romarheim Entreprenør har grunn- og byggkontrakten for utvidinga av Blåfalli koplingsstasjon og etablering av den nye transformatorstasjonen på Gismarvik. Selskapet har no starta med å etablera riggområde og deponi ved Blåfalli koplingsstasjon.

Bonus og malus

«Neste skritt er å gjera klar stasjonstomta, slik at grunnarbeida der kan starta opp i byrjinga av desember. Arbeidet med opparbeiding av tomta er forventa å føregå i perioden fram til slutten av januar. Når stasjonstomta er gjort klar, vil arbeida fortsetja med etablering av fundament for nye høgspentapparat og bygging av nytt kontrollhus og nytt lagerbygg. Blåfalli koplingsstasjon skal utvidast med cirka 10 dekar», skriv Statnett.

Kontrakten for begge stasjonane inneheld eit klimagassbudsjett og CO2-prising, og er den fyrste i sitt slag for Statnett. Dette har til hensikt å sikra at arbeidet vert gjennomført med eit lågt klimagassavtrykk.

«Ved gjennomføring vil faktiske utslepp av CO2 bli målt mot klimagassbudsjettet dei har levert inn. Kontrakten er sett opp slik at entreprenøren vil kunna få ein bonus om dei reduserer utsleppa, og vil få ein malus (straff) om dei ikkje klarar budsjettet», vert det opplyst.

Arbeida med Gismarvik transformatorstasjon i Tysvær har planlagt oppstart i januar 2025.

Fem trinn

Leidningsentreprenørane Dalekovod og Kraftmontasje går i gang med bygginga av den cirka 88 kilometer lange leidningen våren 2025. Dalekovod skal byggja leidning frå Kvinnherad til Knapphus i Vindafjord, og Kraftmontasje skal byggja vidare frå Knapphus til Gismarvik i Tysvær. Oppstartstidspunktet for arbeidet med leidningen og Gismarvik transformatorstasjon er avhengig av godkjente detaljplanar frå Norges vassdrags- og energidirektorat.

Byggjetida er estimert til tre til fire år

Statnett legg opp til trinnvis utvikling i områdeplanen for Bergensregionen og Haugalandet. Blåfall-Gismarvik er trinn 2. Sauda-Samnanger gjennom Kvinnherad er trinn 3, medan det femte av 5 trinn er Blåfalli-Husnes (Onarheim)-Børtveit-Stord-Spanne-Håvik (Karmøy).