– No skal beviset på veggen
Røyrane Bobilcamp vart kåra til årets bubilparkering i 2023. Fredag fekk dei skiltet som vil fungera som eit evig bevis på det.
Publisert
Sist oppdatert
Leiar for region Vest i bubilforeininga Sveinung Malkenes hadde fått det ærefulle oppdraget med å dela ut plaketten for årets bubilplass i 2023.
– Eg vil få gratulera dykk med prisen årets bubilparkering. Dette er ein pris som er stemt fram av medlemmane i bubilforeininga og lesarane av Din Fritid. Me har laga eit skilt som de kan festa ein eller annan plass her, sa Malkenes og overrekte det fysiske provet på heideren.
Annonse
God start
Bubilparkeringssjefen Ingemar Røyrane tok seg eit ekstra sekund for å studera skiltet, og nikka nøgd.
– Kva kan dette bety for dykk?
– Det vil nok bety at det kjem til å koma mykje meir folk, så det er veldig positivt. Då fellesferien starta i fjor, var det lite folk her. Då skulle alle nordover eller dit finvêret var. Eg trur me har hatt 600 overnattingar sidan me opna rett før påske i år. Det kjem mykje bilar i helgene, men det kjem også meir mellom helgane no, og me ventar det blir endå meir når folk startar på feriane sine snart, trur Ingemar Røyrane.
Annonse
Den vesle bubilparkeringa kjem då til å få brynt seg.
– Det er nok med 20-25 bilar, då er det fullt. Det skal vera triveleg for dei som er her også. Me er jo ein liten stad, opp mot dei andre som var med i avstemminga, påpeikar bubilsjefen.
Det er alle mogelege typar besøkande dei får, både dei meir kortreiste og dei langvegsfarande.
Familieføretak
Ingemar eig og driv Røyrane Bobilparkering saman med barna Maria, Ørjan, Tor Rune og Jon André, og dei fem eig like store delar i driftsselskapet.
– Me har brukt litt ressursar på å laga det til, men tar det steg for steg, slår Ingemar fast, og nikkar i retning sanitæranlegget, minigolfen, kajakkutleiget og ikkje minst naust-skråstrek-sosiallokale.
Annonse
Maria og Tor Rune Røyrane var begge delaktige då overrekkinga vart feira med kake, og sidan begge bur berre ein halvtime unna, blir det til at dei bidrar.
– Eg jobbar i Nordsjøen og har fire veker fri i slengen. Då er det lett å koma hit, setja seg i gravemaskinen og bidra, illustrerer Tor Rune.
– Alle barna bidrar, også dei to som bur lenger vekke, presiserer Ingemar og eksemplifiserer med at Ørjan, som bur i Drammen, gjer mykje av økonomiarbeidet.
– Eg vil tru at jo meir blest du får, jo meir forskjellige typar gjester får du, meiner Malkenes frå bubilforeininga.
– Me skal få beviset for prisen på veggen. Det blir her nede på området, ikkje oppe i vegen, slår Ingemar fast.
