No skal 109 leppefisk-teiner bli destruert
Første helga i august vart det oppdaga ei rekkje umerkte teiner i Oskjesvikjo som bar preg av å ha stått der lenge utan tilsyn. Då Fiskeridirektoratet var til stades onsdag, vart 59 nye teiner funne.
Publisert
Sist oppdatert
– I går drog dei inn 59 nye teiner, som kjem i tillegg til dei 50 som vart funnen tidlegare i månaden. Alle teinene er av typen som fiskar leppefisk, og alle bar preg av å ha stått i sjøen i eitt til to år utan tilsyn, opplyser politistasjonssjef Sigurd Børve.
Utan ID
Annonse
Ingen av teinene var merka med ID, noko som er pålagt for lovleg fiske.
«Alle teiner og ruser skal merkast tydeleg med namn og adresse. Sjølve reiskapen skal merkast, i tillegg til minst eit av vaka / ei av blåsene», heiter det på nettstaden til Fiskeridirektoratet.
– Teinene har no blitt tatt opp og overlevert politiet. Vi opprettar sak og gjennomfører destruksjon av desse, held Børve fram.
Sjølv om saka ikkje naudsynt kan koplast til den same fiskaren, er det tidlegare funne same type leppefiskteiner i Høylandssundet. Også desse blir destruert.
