No kjem Statnett sitt traséval

I torsdagens kommunestyremøte presenterte vikarierande kommunedirektør Gunn Berit Sandnes Fosse eit interessant nyhende om 420 kV-linje frå Blåfalli til Mauranger og vidare til Samnanger. Statnett har nemleg varsla kommunen om at selskapet si melding til NVE om bygging av linja kjem ein av dei fyrste dagane.

– Det betyr at då kan innbyggjarane gjera seg opp ei meining om kor linjene kjem til å gå og få Statnett si vurdering av kor den føretrekte linje skal liggja. Kommunen oppmodar innbyggjarane om å gjera seg kjende med linjene og førebu eit høyringssvar. Dei som kan gje høyringssvar er i hovudsak dei som vert berørte, til dømes kommune, statsforvaltar, fylkeskommune, grunneigarar og rettigheitshavarar, opplyste ho.

Avhengig av saka vil òg aktuelle frivillige organisasjonar, foreiningar, råka nettselskap og andre som representerer grupper som har interesse i saka bli orienterte.

Blir viktig

– Prosessen vidare er at når NVE mottek meldinga frå Statnett, vil dei bruka litt tid på å finna ein sakshandsamar. Når dei har fått sakshandsamar, vil NVE sende meldinga ut på høyring. Då er det godt å vera førebudd, og kunna kommentera dei ulike alternativa. NVE vil òg halda folkemøte i løpet av høyringsperioden, sa Fosse.

– Det er ingenting som er vedteke på dette tidspunktet, så høyringssvara blir viktige. Di meir konkrete og saklege høyringssvara blir, jo betre er dei, la kommunedirektøren til.