No kjem skattepengane

I Kvinnherad kan 6.591 skattytarar gle seg over at dei i dag får tilbake på skatten.

I samla sum får kvinnheringane tilbakebetalt i overkant av 68 millionar kroner, medan resterande 1.229 skatteytarar må ut med 22 millionar kroner i restskatt. Det gjev eit snitt på 10.381 kroner i skatt til gode og 18.121 kroner i restskatt.

Med det ligg kommunen heilt på snittet i Hordaland. Der 262.000 skatteytarar får 2,8 milliardar kroner igjen på skatten, noko som tilsvara eit snitt på 10.800 kroner. Resterande 51.700 som må punga ut for restskatt skal i snitt betala 17.000 kroner tilbake.

På landsbasis er det åtte av ti som får utbetalt pengane i dag.

– Ikkje alle får skatteoppgjeret sitt i juni. Det kan vera fordi du er næringsdrivande, er gidt med ein som er næringsdrivande, eller at du er lønstakar/pensjonist og leverte skattemeldinga på papir. Då får du skatteoppgjeret tidlegast 2. august, fortel avdelingsdirektør i Skatteetaten, Marta Johanne Gjengedal.

Er du ein av dei 1.229 som må punga ut for restskatt, er fyrste frist for å tilbakebetala det du skuldar 20. august. Og Gjengedal oppmodar alle som har betalt for lite til å sjekka skattekortet sitt.

– For å unngå restskatt må du hugsa å sjekka at skattekortet ditt er rett. Dette kan du sjølv endra på skatteetaten.no dersom inntekt, formue eller andre forhold endrar seg undervegs i løpet av året, seier Gjengedal.