– No kan Ølve smykka seg med verdas finaste bru

Torsdag var ordførar, barnehage, fylkeskommune, entreprenør og innbyggjarar til stades i Ølve for å vitna opninga av Husa Bru.

Med kaka, kaffi og strålande vêr, sistnemnde bestilt av Ove Mansåker i fylkeskommunen, kunne ein endeleg gle seg over ei ny bru i Ølve.

Prosjektleiar i fylkeskommunen Bjørnar Bekkevold Eidnes ynskja velkommen til dei om lag 60 som møtte opp utanfor Jokerbutikken.

– Vi står her under talar og snorklypp, så slepp vi gå ut i vegen og stoppa trafikken. Viss ikkje alle er her no då, det er jo så godt oppmøte, sa han.

Ordførar Vegard Bjørnevik var også på plass. Han skulle klyppa snora og dimed opna si fyrste bru.

– Eg har tidlegare sagt at Ølve er verdas finaste plass. Og no kan Ølve smykka seg med verdas finaste bru. Det er ikkje mange lokale bruer eg kan namnet på, men Husa bru er ei bru eg har visst namnet på lenge og ei bru eg aldri kjem til å gløyma, sa Bjørnevik.

Ordføraren fortalde også kva som kunne skjedd om det ikkje var kome ei løysning på bygging av ny bru i Ølve.

– Soga seier at tidlegare ordførar Peder Sjo Slettebø og varaordførar Leif Sverre Enes på eit tidspunkt sa at dei kom til å bygga brua sjølve om det ikkje skjedde noko snart. Det kan jo tenkast korleis brua hadde sett ut i så tilfelle, og eg trur vi skal vera glade for at det er profesjonelle som har gjort jobben, sa han til latter frå dei frammøtte.

Klødde seg i hovudet undervegs

Frå fylkeskommunen møtte byggeleiar Ove Mansåker, prosjektkoordinator Jeanette Helleland og prosjektleiar Bjørnar Bekkevold Eidnes.

– I går låg eg på golvet og bygde Lego med barnebarnet mitt og han lurte litt på kva eg haldt på med. Då sa eg at eg har heldt på å bygga ei bru. Det var han ikkje imponert over, han byggar jo bru kvar dag, sa han. Eg sa til han at vi har bygd to bruer, og så har vi revet to bruer. Då såg han på meg og sa «men besten, då har du jo ikkje gjort nokon ting», fortalde Mansåker, og la til;

– Dykk som står her ser at det har skjedd noko.Vi har klødd oss litt i hovudet under vegs, spesielt dette med fortau lurte vi litt på. Rundt 1.desember sa vi at vi reiser ikkje herifrå utan å ha bygd fortau. Og ved hjelp av gode samarbeidspartnarar fekk vi det til.

Til slutt fortalde dagleg leiar i entreprenør Consto Øystein Mehl Eide litt om byggjeprosessen.

– Det har vore litt utfordrande grunnforhold, ein del kurver, fall og knapt nok ein einaste rett linje eller vinkel. I tillegg ligg brua dels i sjø og dels i ei vasstraum som har strenge restriksjonar. Men oppgåva er løyst og i dag skal vi gle oss over det vi har fått til. Vi har fjerna ei defekt og utskiftingsklar bru og erstatta den med det vi kan kalla eit smykke av ei betongbru, sa han og la til;

– Til alle dykk som er her i dag, tusen takk for at vi har fått jobba på denne nydelege plassen. Vi som har jobba her har sett nok til å kåra Ølve til Noregs mest idylliske plass. Og til dei som lurar; det er dette som er den finaste sida av fjorden.

Heldige som bur på Vestlandet

Etter talar og snorklypp song ungar frå barnehagen og skulen i Ølve den passande songen «Bukkane bruse», om dei tre bukkane bruse som skal til setra for å gjera seg tjukke men må over ei bru det bur eit troll under. I tillegg song dei ein flott song om vestlandet, som gjekk slik;

«Over eit fjell, gjennom ein tunell, over ei bru, der bur du. Håpar du veit kor heldig du er som bur på Vestlandet».

Ordførar Bjørnevik hadde berre fine ord å sei etter dagens opning.

– Dette har vore flott. Eit fantastisk oppmøte, fantastisk vêr, song og ikkje minst ei fantastisk bru, sa han og la til;

– Vi ser jo at dette betyr noko for mange, og det er ei stor investering i infrastrukturen her i Ølve. Det var rett og slett rørande og eit vakkert augeblikk å få vera med om.